Kolong ang'orot ayakasi ng'akolonga ng'akankarei kidiama nadis. Apotu ng'amorokin kech kitiliwosi akwap na erirae noi nabo pe apedorete ng'itung'a atitinyikin.

Sodi, apotu ng'ikaitotoi ng'ikanikarei lu aponito alokitela a Munda totiakut akiar ng'akolongin nguna. Apotu togumasi ng'ichipeta nabo topedosi akiar ng'akolong'in ng'akankapei.

Tokona, na ayakareta ng'akolong'in, abu aribu min wadaang.

Pe apedori edir aking'olikin ng'irisio, anang'anakin ng'itome lokito, epudate ng'apoi ng'ing'atunyo nabo ayei akitapirikin wadaang.

Apotu ng'itieng tonyarata atuk nachamakinet atiakunet erot. Abu apoo tolimok kesi kidiama apei a ng'akolong'in na aroko eyeri nabo idaikina yaye emoru. Na kanenei ng'ae ng'ini ni itemokino enyarae akolong?

"Anyarae ayong akolong," tolim eng'atuny, kotere aria ng'esi ekapolon amoni. "Akolong, akolong, kelipit kare nimatar nikalonon anikosi. Tobong'u nabo kitocheik sua," kirurumak eng'atuny. Na kaneni nyepupokina akolong ng'esi.

Tanyarai etom nabo. Kikeu akan keng nabo togirok, "Akolong, akolong kelipit kare tobong'u," na kaneni nyepupokina akolong ng'esi.

Abu ekales lokebusean kidong'ak nabo kilipakin, "Akolong, akolong kelipit kare tobong'u." Na kaneni tong'er akolong apudun. Ipei arumoret aniche, apotu ng'itieng daang tanyarata akolong, na kaneni nyepupokina akolong teni ipei kech. Arumoret, abu ekokoroit kilipakin anyarare akolong. Apotu daang tokieneta. Arai eng'atuny ekarikon lokajokon. Abu tolim, "Echamakina ekokoroit einakino alolom kitetemok."

Tochadun ekokoroit ng'aren nabo toruki, "Kookoodokoo-koo."  Anatalaret a ng'itung'a kadaang, abu akolong tojipu kayaye emoru.

Tabu ekokoroit toruki nabo, esa ng'olo echalakinit wadio, "KookoodoKOO-KOO" Abu akolong kikeun kidiama wadiochichi. Abu ekokoroit toruki na ang'auni. Esa lo aria etoil keng lo echala nabo lo ilere, "KOOKOODOKOO-KOO" abu akolong kikeun noi nabo tochau. Achaunit wadaang. Apotu ng'itieng tolakaros nabo kiirasi ng'itung'a atamar alachar egos.

Apotu ng'itieng tolimokis ng'itunga atamar kimiekis akiar akolong nabo tochamut kesi. Akisiakin akwaar ng'ina napei erukino ekokoroit nataparach, tojipu akolong nabo tocha alokidiama.