Khale, inziayo baliho Were musafu. Obululu bwomubasu kwabu bwasambanga muno okhushira, okhuula abandu nibakhaywa okhwifwira nakwo.

Kho abasiani musafu okhurula mu luyia lwa Baleka, nibalola mbu beere Were abo. Babalasa tsimbeko ne nibeera basasaba khubo. Were wa musafu niyebanda inyuma welitulo.

Ne olwa Were barulao, eshirima shiafunikha buli abundu.

Efichwaya shifialola tsingwe tawe. Tsinzofu tsietuya busa khumisaala. Efituyu fiabura busa khutsitalanyi ne eshifuluko nishiba eshinji.

Okhunyoola injira yokhumala obutinyu obo, tsisolo tsialola mbu tsiikhale khushiabusi. Eshituyu nishitsiboolela aka Were mulala khu musafu balia, owali nashiliwo omulamu ne niyefisa inyuma welitulo. Ne niwina owali nanyala okhulanga Were oyo okhurula ebulafu?

Italanyi niyibola iri, "Esie ndalalanga Were oyo, okhubeera niyo eyali omuruchi womushitsimi." "Were, Were, olakhwirukha tawe. Kalukha okhukhosilie omubasu, '' Italanyi niyilokha. Ne Were shiyairechelesia ta."

Inzofu niyilondakho okhulanga. Yanyiira omukhono kwayo niyifuureresia. ''Were, Were nochama kalukha." Wele shiyairecheresia tawe."

Simbi nikhashina ne nikhasaba khari, "Were, Were chama okalushe." Ne Were naloba okhurula elwanyi. Tsisolo tsiosi, ndala khu yindi nitsilanga, ne shiyaulira yosi yosi tawe. Olunyuma itaywa yerusia okhulanga Were. Buli mulala yatsekha. Italanyi, ngo omwimilisi wa boosi niyiboola iri, "Itaywa ikhoyere okhufuchirirwa okhutemakho."

Itaywa yasita imberi ne niyikholiokha mushiwoyo, "Kokolio-koo." Buli mulala nachenya, olwa Were yalenjererakho elwanyi atiti inyuma welitulo.

Itaywa niyikholiokha khandi, olwenolo nende amanikho, "Kooko-lioo. Koo." Were khandi naninakho ekulu atiti. Itaywa niyikholiokha olwakhataru. Olwene luno niyininia omwoyo ekulu nende amani amanji. "Kookoolioo-koo." Ne Were nanina ekulu nende obulafu obunji. Obulafu bwakha buli abundu. Tsisolo tsiasangala nabo abandu nibasakulukha.

Tsisolo nitsisaba abandu okhulekha okhwira Were, nabo nibafuchirira bario. Ne okhurula inyanga eyo, Itaywa niyikholiokha mumabwibwi ne Were anina nende okhwakha mwikulu.