Tene tene vyu vaĩ na mũndũũme wekalaa na mũka na kũmwenda mũno. Mũthenya ũmwe nĩwaendie kĩthekanĩ. Enzĩanĩ nĩwakomanie na mwĩĩtu mũasa, mũtheke na mwanake. Nĩwamwendie kwa mĩtukĩ. Mwĩĩtu nake nĩwamwĩtĩkĩlile omĩtũkĩ ĩndĩ amũtavya kana enondo ĩmwe tu.

Nĩwamũie athi mũsyĩ akatile mũka nondo ĩmwe amwetee avikye nondo ilĩ nikana matonye kũtwaana. Mũndũũme ũsu nĩwasembie mũsyĩ, osa kavyũ, avalũkya mũka nthĩ, na omĩtũkĩ amũtila nondo.

Nĩwasembie asyoka kĩthekanĩ vala watiĩte mwendwa wake. Ĩndĩ ndamwĩthĩa. Nĩwamwĩtie kwa ĩsyitwa na wasya mũnene, ĩndĩ nĩkwethĩiwe kĩvindyo kĩnene. Na ĩndĩ niwew'ie wasya ũkyasya, "wĩtana nĩkĩ? Nũndũ ũtesĩ wĩkĩthekanĩ kya Mũsambwa wa Limbeeletwela?"

Ĩla mũndũũme ũsu wew'ie ũu, nĩwasembie mũsyĩ mĩtũkĩ ta kĩsasi Ĩndĩ nĩwethĩie mũka akw'a. Nĩwakwatiwe ni kyeva kingĩ na nũndũ wa ũndũ ũla wekĩte nake akw'a.