Namukose alina emyaaka mwendha.Abaguna mukyalo kye tibatera kusoma.Namukose yali asigala ghaka nga banhinha baja kwisomero.Asigala ghaka okukola emirimo gya ghaka.

Lulala senga ghe,musagho Lamula,yaidha okukyaala ni Bbundha ni Bituli,abaanabe.Musagho mukibuga.Endhuulu dh'eisangalo dh'abuna eibbanga.

''Oli mukibiina ki,Namukose?''Bbundha yabuuza.''Ghazira mpiiya dhakutwaala Namukose kwisomero,''Lata ghe bwe yakoba.''Aye nga olina empiiya edh'okubayiza omukazi oghundhi,''senga Lamula bweyakoba.

Kunco,senga Lamula yatwaala Namukose egh'omukulu gh'eisomero kukyaalo yamughandhiisa.Namukose yalinga ku mukulu gh'eisomero n'eisanhu yamukoba ati, ''nhendha kuba musagho.''

Obwire, Namukose tiyasobora kulambala.Okusoma kwali kwa nco.Yecuusa ghano ni ghale,bwalingirira mu mukasolya.Nga yeghuunhia eisomero linaaba litya.

Namukose yaidhukira obufumo baanhinha bwe bamughayiranga kwisomero.Abasomesa batambulanga n'embooko nga mba ate nga ndheyiriri! ''Abasomesa banankuba?Nhaaba n'emikago?Namukose yeghuunhia.

Empanga nga yakakokolima,Namukose yasituukiramu.Yaanaaba,yaavaala indhifomu,enkampa n'engaito.Yalina endyanga emba.

Ekiseera ky'okuja bwe kyatuuka,inhinha yamunhweeza omukono bamala baaja.Bwebatuuka kwisomero,Namukose yeghuunhia lwaki abaana abandhi bato.Yatya okubuuza inhinha.

Bwe batuuka ku ghankaaki gheisomero,Namukose yaghulira amaloboozi ag'edhaghuulo,''Ba,ba,ba,ba!''Gaali maloboozi ga kidhe kyaisomero.

Yabona abaana abandhi nga balumuka okubita mu ghankaaki gh'eisomero.Namukose yaleka inhinha yaabanhonhereza.

Namukose yatyaama ghamberi mukibiina.Yeebona nga nasinga obuhnenhe,obughanvu era n'obukulu mu kibiina.

Omusomesa gha Namukose yamwendha inho kubanga yali muyondho era nga mukalabatanhi.Abaana abandhi bamuyeyanga kubanga yali nga n'asinga buhnenhe, bughanvu era n'obukulu.Tiyabafaaku kubanga ye yali ayendha kufuuka musagho.