Óre apá té ápa, nétií elipóng kúkuû tung'áni. Néínepu intóyie uní kutíti. Néíkilíkuan ajokí, "ámaâ te íntai, káa ényór intóiwúó pókira aré?"

Néwalikí entitó nábo ajokí, "káanyôr nánú yíéyioô olêng." Néwalikí enkái titó ajokí, "káanyôr nánú impápa olêng." Néwalikí entitó é uní ajokí, "káanyôr nánú pókíra aré olêng."

Néjokí ínâ títo nányôr intóiwúó pókira aré, "túsujúaki peê kíló aiteleikí ilkeék enkoríóng."

Óre peê épúo enelákua, néíkilíkuan inâ titó ínâ kúkuû tung'áni ajokí, "kóreê doí lélô keék linóno?" Néwalikí ajokí, "etíi enkáló e lékua keék."

Nébaikí entîm, néítokí inâ titó aikilikúán ajokí, "kóreê doí lélô keék linóno?" Néwalikí ajokí, "étáá ékíbaikí."

Óre épúóítô, néínepu olpayíán. Néíkilíkuan ilô páyian ínâ kúkuû tung'áni ajokí, "kéji aá enâ títo?" Néwalikí ajokí, "kéji olbéné oiró."

Nédaru inâ kíti titó arány ajó, "máajî olbéné oiró, káajî Kaamungei.  Óoi! Yieyioô áí nányór! Óoi! Impápá láí lányór! Óoi! Enkúkúrí áí nááókíé kulé!"

Óre peê énîng ilô páyian ílô sínkólio léína títo, nésaru aibúng. Néísikie ayakí intóiwúó enyéna. Néíting enkátiní téíne.