Lwali lulala nga omwana gha Wampiti afa.

Kalogoyi yaghulira amawulire.
Yaalumuka ye abenganda be yaakoba, ''omwana gha Wampiti afiire.'' Ba Kalogoyi abandi bona boona baakoba, ''Omwana gha Wampiti? Ago mawulire makalamu. Ba Wampiti bonabona balabe baife.''

Kalogoyi mulala omukulu yaakoba, ''Baganda bange, tuli no okuja ku lumbe lwa Wampiti okumulaga ekitiisa.''
''Eki? Ja kulumbe lwa Wampiti?'' Ba Kalogoyi abandi bwe baakoba. ''Titwenda kuja. Tuli kutiitiira. Ba Wampiti baidha kutusala.''

''Mughulire,'' Kalogoyi omukulu yaakoba. ''Bwe tutaaje ba Wampiti baidha kutunhiigira. Baidha kuba ne ensonga okutusala.''
''Oli mutuufu, ''Ba Kalogoyi abandi baakoba. ''Tuli no okuja ku lumbe lwa Wampiti. Bwe tunaaja ba Wampiti baidha kutusanhukira. Era baidha na kufuuka bakagwa baife.''

Ba Wampiti baaboona ba Kalogoyi kuliya ghe endhu.
''Lwaki ba Kalogoyi bali ghano?'' Baidhye kutusekerera?'' Ba Wampiti beewuunhya.
ba Kalogoyi baawulira ba Wampiti. Baadhugumira bainhama okwemba.

Luno no olwali olwembo lwa ba Kalogoyi:
''Ba wampiti abasuukulumu, muyiiga obwire bwonbwona. Era tubaghulira nga mwemba mu mwezi ogwe ekiinhogogo.''
''Amaino gaimwe maghanvu. Amaiso gaimwe gamyensuukana. Ghaire emmere yaimwe ndhirugavu, obusa bwaimwe bweru.''
''Aye buti, omwana gho alambaire ku buliri bwe. Era mufu! Musemgwa ghaife afiire.''

Dhaadha ghe empiti enfu yabairamu no olwemba olundi: ''Olwemba lwaimwe lukalamu. Ebibono byaimwe bighooma. Mwingire, imwe ba Kalogoyi. Mutyame!''
''Aye mutuleeteire ku ki?
Ba Wampiti bali ndhala. Ba Wampiti benda kulya mmamba!''

Ba Kalogoyi baawulira nga batiire baakoba bati. ''Buti tulumuke.'' Mulala yaakoba, ''Titusobola. Ba Wampiti baidha kutubinga.'' Owundi bwe yakoba.

Kalogoyi omukulu yaakoba, ''Mukama ghange, titughanga kubalaga kitiisa. Tweinhamiire kulwo okufa kwo omwana ghaimwe. Twidha kusaba musengwa okubagumya. Buti tuli no okwirayo eka ghaife.''

''Mulinde!'' Ba Wampiti bwe baakoba. ''Timusobola kuja. Muli no okutughaaku ekintu kyonakyona ekyo okulya. Musaleku ensaya dhaimwe mudhitughe.''

Ba Kalogoyi baalingagana ku. ''Bwe tubagha ensaya dhaife, bayinza okutuleka twa golola,'' bwe baadhuuba batyo.

Ba Wampiti baasala ensaya dha ba Kalogoyi, baadhirya.

Kabiri ba Kalogoyi baagezaaku okugolola.

''Mwemerere!'' dhaadha ghe ba Wampiti omufu yaalira. ''Baganda bange, mwidha kuganha ba Kalogoyi bano okugolola? Mubalingirire! Tusobola okubona amaino gaibwe! Bali kutusekerera!''
''Bali kuseka! Bali kuseka! Ba Wampiti bonaboona baakoba.

Ba Wampiti baabukira ku ba Kalogoyi. Baabaita mulalakumulala, era bainhama okubalya.

Kalogoyi omukulu nga ekaali kufa, yeekalirisa Wampiti yaakoba, ''Wampiti omukanhu, twidhye no olwemba lwaife okubalirisaaku aye tubaire basobya! Olundi bwe munaabanga abayala muteefuulanga muti muli baghafu okulya bakagwa baimwe!''