Ghaliyo omusaadha omukaire nga bamweta Bamukangwire. Yaba nga ni batabanhe be basatu.

Bamukangwire yaayenda batabanhe be bafune ebyo obukombe nga afiire. Yabategekera bokisi isatu.

Bamukangwire yaja ye mulirwanawe Mbago yamukoba, "Nhendha batabanhe bange bafune obugaiga. Ntegeike bokisi isatu. Nhendha iwe obawe bokisi nga nfire."

Bamukangweire yamala yaafa, Mbago yayeta batabanhe bo omugenzi ghalala.

Yabakoba, "Bbaabba ghaimwe yampa bookisi dhino nga akali kufa. Mu idha kunhonia buli muntu eliina lye kwedho. Mutwale ebyaimwe bambi."

Batabanhe batwala bookisi badhibwikula.

Bookisi eyasoka yalimu zaabu. Bookisi eyokubiri yali mu eitaka. Bookisi ey'okusatu yalimu obusa.

Eyayagaana zaabu yali musanhufu. Ababiri tibali basanhufu.

Bainhama ku yomba naye.

"Muli baluganda, timulina ku yomba. Leka mbatwale yo omusaadha omukaire omukenkufu, abaghe ku magezi," Mbago yakoba aboluganda abasatu.

Mbago yatwala Abengada y'omusaadha omukaire omukenkufu.

"Ghagoodye otya. Twidye kusaba ku magezi ku byo obugaiga," Mbago yaakobera omusaadha omukaire.

Mbago yakoba omusaadha omukaire omukenkufu kukya bookisi isatu Bamukangwire dhe yalekera batabanhe be.

"Mperanho balikuyomba kuba mulala yenka neyafuna zaabu," Mbago yabainhonola.

Ono omusaadha omukaire omukenkufu yagumiza, "Bbaabba ghaimwe yalina ensonga lwaki yawa buli muntu ebokisi ye."

Yaja mu maiso, "Eyafuna zaabu, bbaabbawo yayendha obe mu byamatano. Eyafuna eitaka, bbaabbawo ayenda obe mulimi."

Eyafuna obusa obwebisolo, bbaabbawo yayenda obe mwayi. Bbaabbawo yayenda buli muntu abe nomulimo gwe," omusaadha omukaire yamaliriza.

Bwebamala bawuliriza amagezi g'omusaadha omukaire aboluganda abasatu baikiriza.

Bakola emirimo gyaibwe era baba basanhufu.