Nétií apá, nétií olpáyian kársîs olêng. Kéáta inkíshú, néata inkerrá ó inkinejí. Némanya enkóp natíi enkáre nétií inkujít náanyorí. Káke óre egirá amorúáó, nétum osiná sápuk, amû imeáta enkitók.

Óre enkolóng nabô, egirá atón te entonatá ó olchaní adamishó, nétum endúáátá. Néjo, "tenámátúm enkitók, náítobíraki kewán."

Néguatu enkitók te olng'osilá léílo shaní. Óre peê eidíp, néíbung inkonyék enyéna. Nédolishóyu. Néítokí ayang'akí, nétum enkishúi.

Néshil, nédol ajo kéíshiaat. Négil kúng aomón metáa enkitók enyé.

Néísho enchórríbá sídáí naléng. Néísho isaên ó enkíshílí. Imasáa pookí é enkitók nayáma. Néítokí aitobirakí enkají te esárng'ab. Néomón ínâ kitók enyé ajokí, "áátásáyia mílikíoo aké eníng'úaa."

Óre éítû élô enkatá náado, nédol ilmúrrân ínâ kitók. Néjo, "káji eikó oltásât óba injí tenétum enkitók sídáí aikó injí?" Néponu áapurroo. Néya enkáng enyê.

Négila ílô tásat táu olêng. Néísinánuo naléng. Nédol énaa iméídim atotóna métíi enkítok énye. Néjo, "tenááta entóki enyé, majó káítóki aikenú olêng." Nétum inturkuluoní, néírriwáa meshómo áaing'oru enkitók enyé. Néranyakí, áailejilej, áashuku.

Óre peê épúo áatum, néranyakí osínkólio le oó imotónyi: Nákitok, nákitok, naguatúno Írá shíáát aláng inkulíe kitúaak pookí Eirríwua iyíóók olpáyian líno peê kiponú áaya enchórríbá inó.

Néísho ninché enchórríbá enyé. Népuo, négiróo oldónyó, néim ilkejék oméyakí olpayíán. Néíteléíki ínâ shórríbá enkomóm enyé. Nétum enkíléjíléj te enkíti katá.

Káke enyaáka aké anguarrú enkitók enyé. Néítokí airriwaá inturkuluoní. Népuo áarany: Nákitok, nákitok, naguatúno Írá shíáát aláng inkulíe kitúaak pookí Eirríwua iyíóók olpáyian líno peê kiponú áaya enkíshílí inó. Óre peê éíshórî, népuo áayaki olpayíán.

Néng'amáa enkíshíli te enyorratá sapúk. Nédamu enkitók enyé natíi kulíe áng'ítie. Néítadóyio oltáú. Néítokí airriwaá inturkuluoní. Népuo áarany: Nákitok, nákitok, naguatúno Írá shíáát aláng inkulíe kitúaak pookí Eirríwua iyíóók olpáyian líno peê kiponú áaya enkishúi inó.

Népuo intúrkuluoní enkátá e uní. Nédoikí irónyi léína kitók. Néíteru áakurtu inkonyék. Óre nabô kátá, néshuko inâ kítok aakú enkóbéí. Néshuta inkáik ó inkejék ó elúkúnyá. Néosh enkóp abatatá.

Néíbeleleng'óki olpáyian ínâ kóbéí embátá ó olkejú. Néítashéyie te embatá é enkáré. Néítokí intóna áabulaki. Nébulakí ilng'ósîl, ó imbénék.

Náa óre peê ékût imbénék osiwúó, néítayu oltóíló laáíjo olé enkitók náng'uarrú olpayíán lenyé.