Óre te oó larín kumók, nétií endoinyó nájî Olokwango. Etíi inâ doinyó empólos é óng'átá e Ekwere.  Népuku ilkejék ááre te oó imúrten ényená. Nétumo lelô kejék te áborí ínâ dóínyó áaku olkejú sápuk. Néruko ilô kéju aím inkong'át e Ekwere.  Óre enkáré é ílô kejú náa éísidai naléng, nényor inkíshu, inkérra, inkíneji ó inkoiliîn naámanyá nénâ ong'át.

Néatái apá oltúng'ání sapúk népi ójî Matata. Náa ninyé oláríkóní lé Ekwere. Némany ínâ dóínyó. Néítanapísho peê éárí entîm te áborí áaitayu enkóítóí náílep aló endóínyó nélo enetúmore ilkejék. Kéjó peê etumokí ashómo te elélekí.  Óre peê édúngí ínâ tîm, négoro endoinyó Olokwango olêng, amû etudung'óki olmúnyéí lenyé. Káke étíng'íríá.

Óre te enkiting'otó é ewíki, néked inkérâ é Matata shúmátá endóínyó áaiguran. Nédala áakuet ídíe ó ídíe, négil ilng'ósil, nédung imbénék, népej inkújít.

Néíteru inâ doinyó nájî Olokwango aibelekenyá. Némuguta iséderí, néíbelékenya enkómom. Nétiu énaa éímoruo. Óre te siadí, nétoyu lelô kejék. Néídurr inkóíliîn amû meékure etií inkujít náanya, néméékure etií enkáre náok. Nétum iltung'aná póoki óamanyá embátá é ínâ dóínyó osiná.

Néigúéna iltung'aná. Néjo kéítayúni Matata te erikóre. Négeluní Baraka. Néítayu Baraka enkítánápata peê éûn iltung'aná póoki ilkeék te enkányît é Olokwango. Néítobiráki Baraka iltúng'áná émáshô. Néyau iltung'aná iltarákua, ilng'abólo, ilóíríénito, irétét, áaisho Olokwango.

Némétíi líkai túng'ání ónyaaká ailepakí amány ínâ dóínyó. Néítokí inkujít áabulu. Néílepu iséderí. Néítokí ilkejék áalepoyu, néruko. Nényorijú inkong'át. Néítokí inkóíliîn áashukunye. Néponári inkíshu, ó inkinejí, ó inkerrá. Néshukúnye enchípai enkomóm e Olokwango.

Nérany iltung'aná áajo. "Metóbikóí intarasí Baraka, Metóbikóí intarasí Baraka." Nérany Baraka ó iltung'áná pookí áajo, "Metóbikóí intarasí Olokwango, Metóbikóí intarasí Olokwango."