Mu kyalo ekiri kumpi n'enhandha, ghaligho omughala omuto. Eriina lye yali Kampi.

Baaba wa Kampi yali muvubi mumanhifu. Yali n'eryaato lye eitono ery'okuvubisa. Kampi yaghoomerwa okujango okuvuba n'ise.

Kampi yayendanga okwerorera abalenzi nga basamba omupiira. "Ka nzaanheku niimwe," yabegairiraku olunaku lulala. Abalenzi bamusekerera, "Ja ozaanhe kyekweko n'abaghala."

Abaghala baakoba Kampi, "Amagulu go maleeyi inho." Kampi y'anakughala. Buli nco, Kampi y'akinanga n'endhuba yenka. Endhuba y'afuuka mukenkede we.

Lwali lulala endhuba tiyavaayo. Enkoko empanga tidhakolyoka, ebinhonhi tibyayemba n'abaana tibaaja kw'isomero. Waire Ise tiyaja kuvuba. Kampi y'anakughala. "Aligha mukenkede wange, Wandhuba? Lwaki leero kuzimeevu?"

Kampi yaja y'abaana abandi y'abakobera obunakughavu bwe yaliku. Aye baamusekerera, "Ob'olyagho mukenkedewo Wandhuba, afiire. Oba olyagho ekulumwikeku." Kampi y'akoba, "Endhuba mukenkede wange. Teyinza kufa."

Kampi yanakughala inho y'alumukira mu nhumba. Y'asamba inho omupiira gwa mwanhinha.

Kampi y'aloghooza, "Ndidha kuzaanha n'omupiira guno okutuusa mukenkede wange, Wandhuba bw'anaira." Y'asitula omupiira y'aluka nagwo ku luya.

Kampi bwe yatuuka ku luya, y'ata omupiira ghansi. yaloghooza, "Nsobola okuzaanha nga bo." Yasamba inho omupiira. Gwe dhuumba, gw'abulura eyo mw'igulu eridwire ebireri.

Nga buli muntu bwe yalinga ghaigulu, omupiira gw'abulira mu bireri ebizimeevu. Ghabaagho akasirikiriro ghonaghona.

Amangu ago, ebireri ebizimeevu by'awagho endhuba y'aboneka. Obulamu kabiri bw'aira ku kyalo eky'ompi n'enhandha. Buli muntu y'ateekateeka kye yakolanga buli idho.

Kampi tiyasobola ku kikiriza ati aiziiza endhuba ku kyalo. Aye okusingira irara, endhuba yali eize mu bulamu bwe. Y'akoba abaana, "Mukenkede wange, Wandhuba aize!"