Nétií apá, nétií olpáyian ó enkitók enyé. Néata enkéráí nabô. Enkayíóni najî Kisirusiru.

Óre enkolóng nabô éírrítítâ Kisirusiru inkinejí, népolós enkíne enkilâ enyé te emowúó. Néírriwáa ng'otonyé oldúka peê élô ainyang'ú oltídu peê eripakínye ínâ kilâ. Nélo Kisirusiru ainyang'ú. Népik embéné é enkilâ.

Óre egirá ashukó, nétum inkulíe ayíok naáíguranita empíra oó inkejék. Néton siî nínye aigurán. Nédoyio osíntanó te embené, néímin. Óre peê ebayá áng, nélikí ng'ótónyé enataáse. Néjokí ng'otonyé, "enkéráí áí, óre likái kékún tenínyáng'u osintáno, nírin te enkárdasi." Néjo Kisirusiru, "áyia, átóníng'o."

Óre áí olóng, nélo Kisirusiru aokú enkáré. Nénap emókór. Nédamu enapá natiáka ng'otonyé. Néírin emókór te enkárdasi peê méímin. Káke óre te enkoitóí, népolosa enkárdasi, nésulári emokór. Nédanya, néíbukóri enkáre. Óre peê ebayá áng, néírorie ng'otonyé ajokí, "enkéráí áí, óre peê intóki anáp emókór, nípik elúkúnyá."  Néjo Kisirusiru, "áyia, átóning'o."

Óre peê ékényû, néírriwáa menyé meshómo airritá inkinejí. Nédamu enatiáka ng'otonyé, népik enkíné elúkúnyá. Nékokót enkíne Kisirusiru, néimu osárge enkomóm. Óre peê édôl menyé, néjokí te engórô, "kánu kenyá ípál emodái? Te olgósoi oshî eení enkíné, néyiatarí!"

Néítokí menyé airriwaá osokóni peê élô ainyang'ú enkiring'ó. Nédamu enatiáka menyé. Néen enkiring'ó te olgósoi, néyietáa oméítabáí áng. Téjo siî íyie ádámú eneteyía inâ kíring'ó peê eitabarí áng. Óre peê édôl menyé, négoro olêng. Néjokí peê éên ilolân aidúr téína âng.

Némut ng'otonyé peê eiriamaríyie enkéráí enyé. Néshoróo emilánko peê épúo áashetarie áté te enkáji ng'ejúk.

Némanáa te enkatá náado éítû étûm eneshetíé enkají ng'éjúk. Óre peê émútû, néjo peê eilepáki olchaní áairrag, népetáa emilánko.

Óre áâ enakedíé ílô shaní, néning iltólóíshi te áborí olchaní. Nédól iléwa ílê ootíu énaa ilárruok, nénapita ilbeníá. Néírut olêng ometúsulú enadúóó milánko. Néosh enkóp. Néírut iladúóó léwâ, néísik, néíng'úaa pookí tókî dúóó naáta.

Nédou Kisirusiru ó ng'ótónyé te olcháni. Óre peê ébôl iladúóó beníá, nétum iropiyianí, ó inkiláni ó ilkárash. Nétum intokitín pookí naáyieu te enkáji ng'ejúk. Népuo áashet enkají ng'éjúk. Nébik téíne te enchípai.