Nétií apá olpáyian ójî Goso. Néíteng'ên inkéra enyéna te entonatá ó olchaní.

Óre entéípa nabô néked enkóílií nájî Paa ílô shaní apurroó ilng'anayíó. Nésulu olng'anayíoi sápuk. Neosh iló ng'anayíoi Goso elúkúnyá néar metúá. Ore peê éínépû inkérâ oláíténg'énani lenyê eirrág te enkôp étúa, néísinánuo olêng. Népuo áaing'oru olatará Goso.

Néítashéyie osíwúó oing'úaa móikúápé. Néíkilíkuan áajoki, "Ké iyíé ótusulúá olng'anayíoi otaará oláíténg'énani lâng ojî Goso?" Énáátá éítû iás ínâ. Néjokí ilô siwúó, "Tenááta engolón nabâ néjia, énááta éítû áaiboóyo esúntai é esarng'áb."

Népuo nenâ kérâ enetíi esúntai é esarng'áb. Néjokí, "ké iyíé náíboóyie osíwúó le móikúape otusúlua olng'anayíoi otaará Goso?" Énáátá éítû iás ínâ. Néwalikí esúntai ajokí, "émaâ tenáa kágol olêng, káji eikó endéroni tenáalutoó?"

Népuo enetíi endéroni, néjokí, "Ké iyíé nátulutóyie esuntái é esarng'áb naiboóyie osíwúó le móikúápe otusuláyie olnganayíoi otaará Goso?" Énááta éítû iás ínâ. Néwalikí endéroni ajokí, "émaâ tenágól olêng, kénáátá áanyâ empúus?"

Népuo enetíi empúus, néjokí, "Ké iyíé náínosá enderóni nátulutóyie esuntái é esarng'áb naiboóyie osíwúó le móikúápe otusuláyie olng'anayíoi otaará Goso?" Énááta éítû iás ínâ. Néwalikí empúus ajokí, "émaâ tenágól olêng, kénáátá áení te olgósoi?"

Népuo enetíi olgósoi, néjokí, "Ké iyíé óteená empuús nainosá enderóni natulutóyie esuntái é esarng'áb naiboóyie osíwúó le móikúápe otusuláyie olng'anayíoi otaará Goso?" Énááta éítû iás ínâ. Néwalikí olgósoi ajokí, "émaâ tenágól olêng, kénáátá áadûng enkalém?"

Népuo enetíi enkalém, néjokí, "Ké iyíé nátudung'ó olgosói oteená empuús nainosá enderóni nátulutóyie esuntái é esarng'áb naiboóyie osíwúó le móikúápe otusuláyie olng'anayíoi otaará Goso?" Énááta éítû iás ínâ. Néwalikí enkalém ajokí, "émaâ tenágól olêng, kénáátá áanyâ enkíma?"

Népuo enetíi enkíma, néjokí, "Ké iyíé náínosá enkálém natudung'ó olgosói oteená empuús nainosá enderóni nátulutóyie esuntái é esarng'áb naiboóyie osíwúó le móikúápe otusuláyie olng'anayíoi otaará Goso?" Énááta éítû iás ínâ. Néwalikí enkíma ajokí, "émaâ tenágól olêng, kénáátá áaâr enkáre?"

Népuo enetíi enkáre, néjokí, "Ké iyíé nátaará enkímá nainosá enkálém natudung'ó olgosói oteená empuús nainosá enderóni nátulutóyie esuntái é esarng'áb naiboóyie osíwúó le móikúápe otusuláyie olng'anayíoi otaará Goso?" Énááta éítû iás ínâ. Néwalikí enkáre ajokí, "émaâ tenágól olêng, kénáátá áaôk enkíteng?"

Népuo enetíi enkíteng, néjokí, "Ké iyíé nátookó enkáré nataará enkímá nainosá enkálém natudung'ó olgosói oteená empuús nainosá enderóni nátulutóyie esuntái é esarng'áb naiboóyie osíwúó le móikúápe otusuláyie olng'anayíoi otaará Goso?" Énááta éítû iás ínâ. Néwalikí enkíteng ajokí, "émaâ tenágól olêng, kénáátá áaôny olkimpáí?"

Népuo enetíi olkimpáí, néjokí, "Ké iyíé ótoonyó enkíténg natookó enkáré nataará enkímá nainosá enkálém natudung'ó olgosói oteená empuús nainosá enderóni nátulutóyie esuntái é esarng'áb naiboóyie osíwúó le móikúápe otusuláyie olng'anayíoi otaará Goso?" Énááta éítû iás ínâ. Néwalikí olkimpáí ajokí, "émaâ tenágól olêng, kénáátá áaâr enkóílií?"

Népuo enetíi enkóílií nájî Paa, néjokí,  "Ké iyíé náínosá olkímpáí ótoonyó enkíténg naookó enkáré nataará enkímá nainosá enkálém natudung'ó olgosói oteená empuús nainosá enderóni nátulutóyie esuntái é esarng'áb naiboóyie osíwúó le móikúápe otusuláyie olng'anayíoi otaará Goso?" Énááta éítû iás ínâ.

Néíng'asiakíno Paa eneikunáki peê etayiolokí. Nélau énájô. Etayíóloitô inkérâ áajo ninyé nátusuláyie olng'anayíoi otaará Goso. Néari siî ninyé.