Aabawo khaalekho, yabawo umulimi mutweela n'umukyelama weewe, nga bali n'umwaana uwesiinde mutweela yenyene, isi baalaanga bari Kusilu.

Shifukhu shitweela, nga Kusilu ali khuurusa tsimbusi ibulafu, lulwiika lwe mbusi lwonuula isaati yeewe. Maayiwe waamurumana khwi tuukha, khuukula impiso, anyale khuunaba isaati yeewe. Kusilu waakula impiso, waakira mu sawu ye saati yeewe.

Nga n'aaba ali khuutsya ingo, wanyoola basooleli bali khuukhupa kumupila, naye waabetubaasakho. Impiso yaakwa aasi yakoraana. Nga woolele ingo, waaboolela maayiwe byoosi nga ni byaba. Kila maayiwe amulomela ari, "Mwaana wase, lulwiilakho, uwaamba impiso waakiwuna khu lupapula." Kusilu weelamo ari "Naawuliile maayi."

Shifukhu shisheelakho, umusooleli tsana waasuta isoongwe waatsya i luutsi khuutaha kameetsi. Washebulila sheesi maayiwe aamulomela, aryo waabukula lupapula waalubowa khu soongwe, akisute akiyile ingo. Ne nga ali khu ntsila, lupapula lwonuukha, isoongwe yekhupa aasi, yaatikha yekyela bikholontsyo. Kameetsi koosi kaatsutsukha aasi. Ne n'aamala khukhwoola ingo, maayiwe weelakho luundi waamusontsoola ari, "Mwaana wase, lulwiilakho, witwiikha isoongwe khu murwe, usute kameetsi, sikatsutsukha ta. Kusilu weelamo ari, "Naawuliile maayi. Ari Naamanyile.

Shifukhu shisheelakho, paapawe waamulomela khuusamusa tsimbusi khukhwaaya. Kila ashebulila sheesi maayiwe aamulomela. Waasuta imbusi ndweela, waakitwiikha khu murwe! Imbusi yaasambakana, yaanuubula kumurwe kwa Kusilu. Imbuka ifwiiti iri, kamafuki kaaba nga kerurukukha mu bweeni mwoosi. Kila paapawe wewusa ari, "Iwe ulyaakamisa liina buusilu ibwo? Tsimbusi batsibowa, baatsikhweesa ni kimikosi. Nga waakhukhola bibiindu ni kamakyesi, kane urure ango ano."

Shifukhu shisheelakho, paapawe aarumana umusooleli uyo khuukula inyama mu khatale. Aryo nga washebuliile sheesi paapawe aamulomela, Kusilu waabowa inyama kumukosi, waarakikha khuukikhweesa khuukireera ingo. Aatimaka khaangu naabi khuubona ari akhaliindisa paapawe ta. Nawe yambaasa ubone inyama nga ni yafwaana nga waakyolesile ingo!

Paapawe waakhalala naabi. Waamulakila khuubowa bibiindu byeewe arurewo. Ne maayiwe nga waawuliile shino, waakhalawo khuutsya n'umusooleli weewe. Baasuta lulwiitsi abe lwe mufuumbilo baatsya ni nalwo, khuukana babekho ni sheesi barakikhilakho nga boombekha intsu yaabwe.

Baakyeenda lukyeendo luleeyikho, ne nga sibanyoola shiifwo mweesi banyala khukhwoombekha intsu yaabwe ta. Ne antsye ni bweelabula, baakhalawo khuuniina khu kusaala, bakonekho ni lulwiitsi lwaabwe.

Ne nga nio baliniinile khu kusaala, baawulila liyoombo aasi. Uri balola, baabonayo basaani basesaba baarafu babeene baabaliile tsisawu tsimboofu. Umusooleli ni maayiwe baarya naabi, baalekhuula lulwiitsi lwekhupa aasi, lwaaranikha – lwaariisa basaani bano, baarya naabi, shaakila bandaba tsindimo, baalekha buli shiindu shaabwe shoosi inyuma.

Kusilu ni maayiwe beekha khukhwaama khu kusaala. Ne ni beekula tsisawu itsyo, baanyoolamo tsinusu, tsingubo, tsibulangiti, na buli shiindu sheesi baakana, bye khuurakikhilakho muuntsu yaabwe imbya. Khaangu busa banyoola shiifwo beyoombekhela intsu imbya, baamenya mubweenemwo, nga bali baasangaafu.