Nze ni mikwano gyange, twali basanhufu olwo okwigalwawo kw'eisomero. Twali bakugya mu kiwumulo kya Namuwawuzo. Nali ndina kutuuka ka nakukobera bazaire bange nti, "mbaire mu kifo kya kwinhama mu kibiina."

Nagya eka nga ndi musanhufu. Nali ndi kulowooza, "bbaabba wange anaawulira atya nga omwaana we omulala naasinze mu kibiina ekirimu abaana 57?"

Natuuka eka naayagaana muganda wange Maryamu. Naamukobera amaghuliro gano amalungi.
''Bbaabba ni Maama baidha kukusanhukira. ''Bwe yankoba.

Olunaku olwairaku, nasituka munconco okukola emirimo. Nagya naawa enkoko emere, naalonda amagi, naayambibwaku mukwano gwange Maryamu.

Bwe twamala twaagya eyo obumyu yebukuumirwa twabuwa emere. Maryamu ni Kaziro bannhambaku, nga nze mbugha amaadhi agabumala olunaku.

Obwire bwe twamala okulya ekyeigulo, Bbaabba yaatukobera amawuliro amalungi ati, "tugya kukyalira ikumiro lya bisolo ku lwamukaga." Banange twasanhuka okusingaku buliidho.

Twazuuka mangu kunco okwetegekera olugendo. Ku saawa isatu dheene twatandiika olugendo. Twakumba mukonomumukono. Maama ni Maryamu nze ni Bbaabba.

Twatuuka mu kifo we twabona swiiti ni kyokoleti neebyokugaayagaaya ebiritundwa. Bbaabba yaatugulira twairamu amaani tweyongerayo mu lugendo.

Twatuuka ku mulyango omwoyo gwampwamu. Naatengera nti masanhu ate noogwali omulundi ogusooka okugya eyo.
Nabona ebisolo bingi inho bye nali mboneranga bwa mu bitabo.

Twatuuka eka nga tuli bakoowu aye nga tuli basanhufu eigulo lyonalyoona olw'olugendo n'ebinhoonha. Maama yategeka ekyokulya. Twakiriira mu buliri nga tuli bakooghu inho.