Agho olwatuka ku' kyalo Izagodo. Abantu ku'kyalo kino bonabona baali bato beereere. Tikwaliku naire musaadha oba mukazi mukaire.

Abasaadha na'bakazi bano abato ab'okukyalo kye Izagodo nga basiiba mu'kucina na'kukola bisesa. Balyanga era banhwanga buli kye bayendanga baatamira. Nga baba mu'kukola bisesa omusana no'bwire. Baalwa beerabira no'kukola emirimo.

Beerabiranga ne'byabairegho olunaku olwabise. Bwaja okuca lulala abasaadha na'bakazi bano abato ab'okukyalo Izagodo nga emere ebaweireku. Tighasigalagho naire katondo ka mwenge. Ebivuga byaibwe byonabyona byali nga bimenheike.

Tighaali nnhembo dha kucina. Aye ate baali tibasoola kucina kuba e'ndhala yali eri kubaluma era nga banafu inho. Baaja kuluya lwa'Oza omwami we kyalo baamuliririra inho.

Omwami ono omuto yaafuluma mu'nsisira ye ennene yaabasirisa,"Musirike! Bantu bange abe' Izagodo. Banange musirike. Tuyinza okufa amangu, muleke tukeikerezeku amanhi getukasigaizaku amatono tusobole okusigala nga tukaagheeragheeraku."

Abantu baayasukana,"Niwe omwami waife! Tughonie!" Omwami Oza yali asiriike. Ghaabita akaseera, yaasituka yaabakoba ati,"Nze tikaali mwami waimwe. Nja kuva ku'kyalo kino nje nnonie agh'okwebeera mu miraala. Mulonde omwami owundi."

Oza yabulira mu'nsisira ye yasiba ebintu bye byonabyona yaaja. Abantu baali tibaidhi kya'kukola, naani anaaba omukulembeze waibwe. Beeyongera bweyongere okulira.

Amaloboozi amatono nga malambulukufu bulungi gaakoba, "Ndidha kuba mwami waimwe." Buli muntu yaacuuka okubona mwene maloboozi. Balingaganaku. Balingalinga. Aye tibona ayogeire.

Ekyewunisa buli muntu, Akaisuka ketolayo mubantu. "Yee! Nja kuba mwami waimwe. Nsobola okubayamba. Aye munsubize okulekeragho okusiiba mubyokwesesa obwire no musana. Era muli nokugyira kumagezi gange."

Abantu bano abato baatwalibwa ne'ndhoghooza no'buvumu obw'omwana ono omuto era baasubiza okumugonderanga. Yaabatoola ku kyalo ekyo yaabatwala baigulagho enimiro. Bafuna emere baaghumula. Yaabasomesanga. Era yaabayambanga okubaidhukiza engeri eyokulima.

Akaana kano akato nga n'omwami waibwe, abantu bano baatandiika okukola naamani. Nga bakola era bakola. Mu kiseera kitono kiti, baali ne ebyokulya no'kunhwa ebibamala.

Obwire bwa mirundi mingi, omwana ono omwami yaajanga mu'kyama, yayagananangaku era baatesangaku n'omusaadha omukaire omugezi. Yaamufumiranga enfumo edhabasaadha na bakazi aba amaani abaakolanga ku bizibu bya bantu. Ekiseera bwe kyabitagho, omulenzi ono yaafuuka omusaadha omugezi era owa maani.