Óre apá áâ ng'éjúk enkôp, néítoipito ildóínyo enkóp énaa olkáráshá. Nérem ilkeék óado inkatampó.

Nétií olmóti ógut, ómisimis átua.

Óre te átua ílô motí, nétií ilásur áare. Óre obô náa éísápuk néata ileleoní te osésen. Óre olikái náa éíkibiroto némepe.

Óre enkolóng nabô, nésha enchân sapúk. Néíwuang, néítawâng abóri ílô motí. Nédol lelô ásur enkóp neitú áíkata édôl. Nédol imúain oó intokitín naápaasha. Óre peê eishúnye iná shan, nétoyu enkôp, nébik lelô ásur edamú imúain naátoduâ.

Néjokíno leló ásur, "meékure kíbîk telé móti ómisimis, néírobi." Máílepa áapuo enkóp sídáí. Néíkilikúanu olasuráí kibirotó ajó, "káji kínkunári teníkipuo?" Néwalikí osapúk ajokí, "ékíserpepári."

Néjo olkibirotó, "kékueníyie iyíóók imótonyí amû kítií te áborí ninché. Imikíserpepári, ékipúo te oó inkejék." Néláa ilásur, néíteru áailep te olmóti. Néílep áapuo enkóp nátóyíó natíi ewáng'an.

Óre peê ebayá enkóp nátóyíó, néasayú embáê é enking'asíá. Néípérra ilkídong'o. Néorúnye inkejék áre néata ilkimojík. Óre te áborí ilúkúny, nébulu inkáik néata ilkimojík.

Néíbelékenya lelô ásur, néaku olpayíán ó enkitók.

Néjo enkítok, "ékishêt enkáng âng te enérupa. Óre énaaké níkidol enkolóng éílépû, néírowúájie iyíóók. Níkiramát ilkeék. Níkiaakú ilchoréta ó imotónyi ó ing'úési."

Néjokí oléê enkitók, "óu." Nényorrá enkítok aló. Néíriamári áapuo tenébo enkóp ng'éjúk.