Óre té apa, nétií enkai nájî Nyame. Néíkenóo inkatinîn pookí te shumatá te átua osánduku lé embáo. Négoro iltung'aná te áborí amû imeáta inkatinîn naáínosakíno. Néíkilikuanishóre iltung'aná Anansi, olkéndi ngên.

Népiyayu Anansi enkopitó naporóo aló shúmátá. Néporóo ometábai, néíkilíkuan Nyame ajokí, "ámaâ, káídim anóto inkatitîn?" Káke etakúénia Nyame, néjokí, "kégol enkínyang'á é kúna atinîn, imíndim ainyáng'u."

Néíkilikúánu Anansi ajó, "kébaá entókî náínyang'unyíéki?" Néwalikí Nyame ajokí, "íyakáki ing'úési uní naapî, némétúmoyu te póoki wúéjî. Íyakáki olowuarú kerî opí ilalá énaa eremét, oltímitími óng'ôr iltúng'áná ó olásúráí oijóo iltúng'áná élúlúngâ."  Nékueniyíé Nyame Anansi amû kéyíólo ajó kéísudóro nenâ átinîn áaitobiraki némétúmoyu.

Néshukúnye Anansi. Nédamu ajó káa éídim ataása peê étûm nénâ ng'úési. Nédamu ajó óre olowuarú kerî náa kérresh. Nétur engúmótó nagút, néítoîp te oó imbenék ó ilkújít. Nélo áng anyá endáa. Óre te enkákenya, nélo aleenoó orreshét lenyé. Néínepu olowuarú kerî egirá akokót imártin é engúmótó ajó áílépu.

Néjokí Anansi olowuarú, "óoi íntashó máátáretu olchoré láí. Írragá te kúna keék peê ááílépunye." Néírin Anansi ílô owuarú te olkíitâ. Nénap ayakí Nyame te shumatá. Óre peê édôl Nyame, nékueniyíé olêng, néjokí, "kóreê nénâ kulíe aré?"

Néshukúnye Anansi enkóp, alotú ayá eng'úes e aré. Nédamishó olêng. Nédumu emókór nabóre enkáre, néítokí adung'ú embénéyíó nélo olchaní ománya iltímitím. Nébukokí enkáré enemánya iltímitím. Néítoîpie elúkúnyá enyé embénéyíó páa kébukokíno enkáré.

Néípotu iltímitím ajokí, "lótímitím, óotú éng'urá! Esháíta, néaku éntasiekutú éntijing atúa enâ mókór áí peê míshálúlu!" Óre amû íményôr oshî iltímitím tenéshálú, nékuatu áajing atúa emókór e Anansi.

Néíken Anansi enkútúk é mókór peê méípang iltímitím. Nénap ínâ mókór ayakí Nyame te shumatá. Néjokí Nyáme, "páa kóreê enkáí?" Néméékúré áâ sápuk enkúénía é Nyame.

Nédoyio Anansi aló enkóp. Nédamishó, nédamishó naléng. Nélau énáâs. Néíkilikuanishóre enkitók enyé. Nédumu enchatá, népuo pókíra aré olkejú, enemánya olasuráí. Óre peê ebayá, néíteru áaishankarra. Néjo nábo, "kéadó ená sháta." Néjokí enkái, "imeadó."

Óre egirá áaishankarra, népuku olasuráí. Néíkilíkuan ajokí, "káínyoo nágirá aishankárr intáí?" Néwalikí Anansi ajokí, "kágíra aishankarrakí enkitók áí ajokí, kéadó ená sháta te iyíe. Káke imenyorráa." Néítokí olasuráí ajokí, "kára nanú olásúráí sápuk, néaku káado aláng ená shatá. Íntorisiokóki peê idól."

Néírragie Anansi enchatá aitorisiokí olásúráí. Páa képudáki ínâ shatá aénaá. Nénap ayakí Nyame te shumatá.

Nényorráa Nyame ajó éídípá Anansi ataláa esíle enyé oó inkaátini. Nébol osandúku, néísho inkaátini pookí. Nédumu Anansi inkaátini néítadóu enkóp ayakí enkitók enyé ó iltúng'áná pookí. Óre inkaátini náa peê einosakinói némê inaáísudorí te oó isándukuní.