Hale hale ŋaaliŋo omusinde owaali n'omuhasi wuwe era namwenda bugali. Lulala omusinde oyo gatiina mwideŋo. Ni gengira mwideŋo gaagenemo omuhaana omutono, omuleeŋi era omwene omuŋoono. Omuhaana oyo ŋaweene aŋo gamulya omwoyo era gamuhobya. Omuhaana yeesi ng'amufugiirira. Coka omuhana gamulomera ati gaali n'ebeere erala lyoŋene.

Ng'omuhaana aloma omusinde oyo atiine engo, asaale hu muhasi wuwe ebeere erala alimuleetele. Olwo ko abe n'amabeere abiri, era baŋange ohuŋirana. Ng'omusinde oyo aŋiitaho gagama engo abugula engeso agwa hu nabendene wuwe amusalaho ebeere alikitulaho wokitu!

Ni gahena ng'anyanguha gagamayo mwideŋo aŋa gaali n'alehire omukekede gugwe omunyaaha. Aye gaali aŋuma n'aŋamubonera kadi. Gagesyaho hulanga esiina lirye n'amaani, aye ni ŋabula ehifufula. Ng'aŋo aŋulira ejanjasi ni liroma liiti "Lwahiina olanga? Somanyire oti ŋano oli mwideŋo mu hitehere hya 'Musambwa w' Ebeere erala?'."

Omusinde oyo ni gaŋulira ehyo, gaduluma embiro nanyanguha hy'esasi ni gagamayo engo. Gaali goola omuhasi wuwe ni gahafanga. Olw'esisi ayamaani, yeesi gatondoha ng'afa.