Emyaka kamaala einhuma ere, Ndhuba ni Maadhi baali bagonzania ebitaloodheka.

Bombi bano baaba ghalala ku nsi kuno.

Ndhuba yateranga yaja yaakyaliraku Maadhi, aye Maadhi ti yaajaaku kukyalira Ndhuba.

Ekyalwa eira Ndhuba yalwa yaabuuzaaku Maadhi lwaki ti yajangaku kumukyalira.

Maadhi yamwiramu ati endhu ye Ndhuba yali ntono inho ekibitiriire. Ati, "Bwendidha n'abantu bange ab'eka tuja bwakukubingira ku luya."

Agho Maadhi yaakoba ati, "Bwoyenda nkukyalire weekolere oluya nga lugazi inho. Ndi n'abantu kamaala, era beetaaga agh'okuba nga ghagazi gheene."

Ndhuba yaasuubiza okukola oluya olugazi einho.

Agho Ndhuba yaira eka ye mukaziwe Mwezi, eyamusangaaza nga ali kumwenheregeta inho.

Ndhuba yaakobera Mwezi kyasuubiiza Maadhi.

Olunaku olwairirira yaatoolera okukola oluya olukologho mwanaghayira ni mukagwawe.

Olwamala okukola oluya ati nga akoba Maadhi kwidha kubakyalira.

Maadhi bweyatuuka, yaabuuza Ndhuba oba nga bwanjira ti ghaabe buzibu.

Ndhuba yaamwiramu ati, "Busa ghazira buzibu. Mukagwa njira."

Maadhi yaatoolera okukuuluula nga anjira.

Yaidha n'engoina, n'ebyeike, ebikere, emisota, amakovu, emidindiri, enkudu, n'ebintu ebindi byonabyona ebisula mu maadhi.

Ti bwalwa Maadhi yaaba nga ghaatuuse bwomwemereramu akukoma mu bivu. Yaabuuza Ndhuba oba nga kyali kikaali kuba na buzibu bwe yeeyongera okunjira.

Ndhuba kabiri yairamu ati, "Busa." Kale ababa mu maadhi abandi banjiragho.

Maadhi yaja nga yeeyongera yaatuuka ku buleeyi obw'omuntu okuva ku bigere okutuuka ku mutwe. Yabuuza Ndhuba ati, "Kikaasoboka abantu bange okungiragho?" Ndhuba ni Mwezi bombi bairamu bati, "Yii."

Maadhi yeeyongera okunjiragho, okutuusa Ndhuba ni Mwezi bo baali nakutyama bwa kungulu ku kasolya akendhu yaibwe.

Abantu ba Maadhi baayongera okunjiragho. Era tibwalwa batuuka ku ngulu okw'endhu ya Ndhuba.

Ndhuba ni Mwezi, ekyo kyabakaka okuja okuba ku igulu. Okuva olwo baaba eyo mu igulu tibavangayo.