Eri ndra aje oko Atama vile akua ri. Ayiko Sakaru ni fuupi eri ma edria 'dale ni nga yo. "Ma 'ye Paparu ni aji ajea ma'i bongo dika jijima o'di si!" Sara 'yo ima a'u eyi ni. 'Yo eyi ni e'yo dria. Ati fe ndra erini a'u 'dii o'du eri ni osizu ri ma enziza si. Sara le ndra a'u 'dii tu.

"Mima eda a'u ondi be 'dii pari 'di ma alia ri si ra," Sara ma andri tre. "Ale eyi endri aje vileri ma ageia ku."

Sara dro a'u 'dii endri ma alia ri si amve. "Emima daru aza emini 'di tro pari 'di ma alia ri si ra. 'Ale agu ma nya emi Paparu ma ajea ri si te ku!"

"Iyaa 'yo kini aje 'diri nga ovu oko onyiru enyati Kuluva 'de ri," Sara 'yo ima a'u eyi ni. 'Iyaa 'yo vini ma 'ye ezoanzi azi 'dii ma aza ko nyaka a'diza si." A'u 'dii 'baa asi e'yo eri ni 'yo 'dii si ku. 'Sara!' adri omve eri ingazu joalia, "'Iku a'u 'dii dria, mi emu ma aza ko emvu 'dii ojizu fo!

Rafa ma andri ni ndra afu nya ivile jo ri si tu. Le ma ovu alatara ru aje ni. Oji afa joa 'dii, tri eyi, ondri eyi, dika onyi eyi alatara ru. Kamu de 'bo, ondi alua ni esuru afa azi ma rua ku. A'u 'dii elu angu jotilea si. 'Efu amve!' Sara ma andri tre, 'Efuu amve emima rua onzi, pa andi, dika ti ondi 'dii pie!

Sara bi a'u 'dii ma vuti amve. "Iya nje e'yo ada. Emi drinza eji ama ni" o'yo eyi ma dria. Sara ega e'yo saa were. 'Da ma vutia gu munzii dika asi 'yo, "Ma ega e'yo azi ala ni 'bo." Ebi yi peli ma alia ingazu a'bulea. Sara nya candi a'u 'dii adroria tu. A'u 'dii ega kini eyi ojizu ovu ni muke ku.

Sara su a'u oko ri peli alia. E'do otre dika gba ima opiri'bi okpo si kile ababa fi drinia ni le. "Mima ovu e'yere a'u aza be 'di," Sara tre. "'Di eco ni saa 'du angiri ku!" Sara kamu eri ma ti oji mile ni be 'bo, eca okpo koko, oju'i peli ma ageia la.

"'Di ovu ni saa o'dukozu ri ku," Sara 'yo a'u nde ni. Ya rua ni okpo si yi eri ma rua 'di ni fuzu. "Ika eco anga saa 'di si ku, ma mu mi 'ba 'i oari azi ma alia," 'Yo ei ni. 'Ba eri I aise dria. A'u 'da la'i e'yere.

Rafa oji a'u 'dii alu alu woro. A'u alu alu eca okpo koko de nga de eyi ojii ku. O'ba a'u aro 'dii laini si 'wi aise dria. A'u aluni olo 'i ku. "Ma eyi ku o'duko were," Sara nga eyo ega i ma asia, coti fu amve afa a'diza otakua 'dii nee.

Ayia Anguparu pi Ayia Fetaru be Sara ma awupi. Lee ni yi yima eselea ku. Oku iri 'dii ovu eyi otu Palesa ma aje ni te eco ni eco ni tu mutuka alu ma alia ku obi eyi ni eyi nguzu ri si.

Anguparu ne Sara ma a'u eri ni o'ba 'wi aise dria 'dii. "'Di afa nyaza aluza mani 'ye ji mavile akua ri!" e'do e'yo ega. Ayu bongo Aliza opilea ri, tra a'u 'dii, ombe eyi woro alenia. A'u 'dii woro ovu e'yere. "Ala!" asi gu munji, "Ma eyi zi pari azi ma alia Fetaru ni eco nee ku ni ma alia." O'ba eyi ago bi ma alia ziza ru.

Fetaru le tibi agobi eri ni aguu ni lee tu ri a'di. 'Du sufaria ambo ri mu amvua 'dale. Ka mu ca amvua 'dale 'bo, ne Anguparu ma bongo ombeza ru agobi ma alia. A'u aro 'dii a'de ania ri si woro. 'Eee!' tre, mbu vile abaza si. "Eee, mi a'u alatara ru vini onyi ru tu ri! Ma 'ye mi a'di mavile omvu alia," 'yo asi si.

"Ma curu'do imi zi ngole ya?" Awupi Fetaru'yo. "Le ma esu pari muke ni emi 'ba zu," 'yo eri ni di aci si jo talaa ria. "Ma ega pari azi 'bo," asi 'yo. "Ma emi 'ba jo sia 'bua!" Awupi Fetaru tu pati 'bani to amvutia ri si, o'ba a'u 'dii jo sia mbua. O'du 'da ma vutia, etu efu drio ala ru aje ni. Sara enga o'dua ri si oko. Mu a'u yi ne. Isu au yi aise dria 'dale yo. "Ma ega 'wi di 'bo. Ani ra muu nyaka nda ria," Sara 'yo.

Paparu ma aje ndri tu. A'u 'dii efi agu ma eselea ku sawa ezoanzi izinaka ajiipi 'dii ni ongo tuzu ri si. A'u alu aya I ku sawa agu ongo ngoopi kanisaa 'dii ni ongo ngozu o'duko uru si ri si. A'u 'dii ndra kiri o'duko jo sia sawa oluupi ni e'yo nzezu imbata fezu ri si. Eyi olo eyi ma rua ku sawa, ozoo pi ni otrezu, dika Sara ma idi ni o'du kozu inisi ondroko be ri si. A'u ma pa olo eyi ku sawa kabilo ni fizu indri aje ni ri ma alia ri si. Kabilo 'dii apa keki aje ni ri ze si vaa.

Eri mu ca sawa zamva ma ati ni 'yezu e'yo nzeza de ria, e'yo e'do eyi oja jo sia ri si.

A'u oko ri ya ima opiri'bi, anga ri Anguparu ma dria. Petaru e'do gu. A'u azi anga vini ri eri ma bongo o'di ri ma dria. Agu riipi eri ma ageia 'dii o'bii gu ku. Oku riipi Anguparu ma ageia ri su ima dri mesa etia e'do gu, "ai, aai, aaaaii, he, he, heeeeee!' A'u aceepi 'dii embu woro Anguparu ma dria. Mi econi eri ma dri ne ku!"

Amu eyi e'do otre aguta si. Agupi bii eyi ma 'a agutaa si. Oku oja eyi ogua si agutaa si. Agupi anzi ezo anzi pie bii eyi agutaa si. Dede eyi ma agate azu agutaa si. Mbaza eyi angu so eyi ma tuke si. Oku iri 'dii nee eyi milea, milea, e'do gu. Fetaru nzi ima ti wala agutaa si. Anguaparu ze ima dri vile agutaa si kpere eri ma agbaragbu e'do 'i aya. Sara nga di usu ti be mgbo!

Omu emupi 'dii woro nga 'yo kini ada ada, aje 'da ri nde Enyati Kuluva onyi si ra. 'Eee, emi ma drile ba!' Sara 'yo a'u 'dii ni, esu eri eyi 'ba a'ujoa. 'Ayia 'yo 'i eco emi 'ba a'di omvu alia dika ku," 'yo eyi ni. "Te emi eca vini ondi ru dika. Ma iga ma emi oji dika drusi!