Inyanga yindi khale kwaliho okundu okukhasi okukhoongo. Inyanga yindi shinga kwali nikuchendanga hambi nende inyanza, kwanyoola abana abakhaana bataru. Nikubareba kuri, "Niwina khwiinywe owachamwa nende abebusi bebe bosi babiri?''."

Mulala khu bakhana abo naboola ari, "Mama wanje yanjama okhushira." Oundi naboola ari, "Papa wanje yanjama okhushira." Ne owakhataru naboola ari, "Esie ndachamwa nende abebusi banje bosi."

Okundu oko nikuboolera omukhaana owachamwa nende abebusi baye bosi babiri, okhutukha olukhanya lwe tsikhwi khumukongo kwako. Kho omukhana oyo nakulondakho.

Nibatsiakho oluchendo. Omukhana nareeba okundu oko ari, "Tsikhwi tsitsio tsileena?" Nako nikuboola kuri, "Tsili hambi ne emisala chilolokha chilia."

Nolwa bola hamisala echo, Omukhana nareeba khandi, "Tsikhwi tsitsio tsileena?" Nakwo nikuboola kuri, "Tsili hambi hano."

Batsiririra imberi ne nibabukana nende omusatsa. Nareeba okundu oko ari, "Elira liomwana wo wuno niwi?" Nako okundu oko nikukalusia kuri, "Alangwa mbu Iloloti ilomalomanga."

Omukhana narekukha okhwimba: Shinangwa iloloti yokhwimba tawe, Enangwa mbu Kaamungei, Oho! Mama wanje, wandachama, Oho! Papa wanje, wandachama, Oho! Eshisanda shianje, shienywerangakho, amabere!

Lwo omusatsa oyo yahulira akomukhana oyo yali niyembanga, yamuhonia namukalusia wabebusi be. Olukano luwerao!