Ada yali mulungi inho mu mboneka. Abasaadha abooku kyalokye boonaboona baayenda kumubayiza.

Aye Ada yaabaloba boonaboona.

Olunaku olw'ekiya lulala ghaabaagho omusaadha eyeeyazikwa amagulu ku musaadha owundi, yeeyazikwa amakono ku wundi, ekifuba, enda n'omugongo yaabyeyazikwa ku wookusatu.

Bweyamala okuyimba ebitundu ebyo, yaatoola omutwegwe yaaguta kungulu kwabyo, olwo nni yaaja mu kiya.

Ono yayenda inho Ada era yaaba mumalirivu okumubayiza. Ada yasiima embonekaye era yaayenda amubayire.

Omusaadha yali ava mu kibuga kya ghala inho, aye era Ada yasalagho baireyo batyo naye.

Bwebaali nga bakaatambula ku olugendo lwaibwe okuja ew'omusaadha, mwene magulu yaanona amagulu ge. Kabiri mwene makono yeena yaaganona.

Olumalirira ni mwene kifuba, nda n'omugongo yaidha yaabimutoolaku.

Ada yaja okubona nga ghasigaire mutwe gwonka aye nga gukaaja mu maiso n'olugendo. Ada yatya aye tiyalumukagho.

Baatuuka mu ndhu ey'omutwe.

Enkeera, omutwe nga gukaali kuja mu nnimiro, gwakoba Wankudu guti, "Ada bwagezaaku okweiba, ofuugha endeka eno okuunmanhisa."

Omutwe bwegwavaagho, Ada yaasiba ebintu bye mu mugonero. Yaagezaaku okulumukagho.

Wankudu bwe yabona atyo nga afuugha ndeka ati, "Mutwe, mutwe, Ada abulaku katono okulumukagho."

Omutwe gwaja gwatuuka aghali Ada gwamukoba guti, "Olowooza nga oli kuja gha?"

Agho Ada yairayo mu ndhu ey'omutwe.

Olumalirira Ada yeebuuza ku mulaguzi omukazi amughe ku magezi.

Omulaguzi yaamukoba akole ati, "Gula omugoyo ogw'ebidhandhaali ogwinike mu muzigo gw'eminaazi era ogute mu ndeka ya Wankudu."

Ada yaakola nga omulaguzibwe yamugalagira. Yaata omugoyo mu ndeka.

Olunaku olwairirira Ada yairamu yaasiba ebintu bye mu mugonero yaatoolera okulumukagho.

Aye Wankudu bweyagezaaku okufuugha edeka, omugoyo gule oguwooma gwamugwa mu kanwa.

Wankudu yalya, yaalya, yaalya.

Ada yaalumukagho.