Waaliwo omulenzi nga ni Aberi. Yeekolera ekigaali.

Aberi yali azira muvuzi anaavuga kigaali kye ekiyaaka. Yaakoba mwaninha Meeri ati, "Ndikwendha omuvuzi anaavuganga ekigaali kyange ekiyaaka. Nkusaba ompe dole wo. Asobola okutyama mu kigaali."

Aye Meeri yaakoba ati, "Busa, nze nnenda dole wange. Meeri bwe yaloba okumuganha okukozesa dole, Aberi yaasungughala inho. Yagema dole yaamusikula. Meeri yaasikula omukono ogundi ogwa dole. Aberi yasikula, ni Meeri yaasikula. Omukono gwa dole gwa menhekaku!

Meeri yalira yaalumukira eri maama we. "Maama, bona,"nga atyo bwakoba, "Aberi asikwire omukono gwa dole wange gwamenheekaku. Abaire ayendha dole wange atyame mu kigaali kye aye nze mbaire nnendha kuzaanha na dole wange. "



Maamawe yaakoba ati, "Aberi tiyeebisiiza bukalamu."

Maama yaloghooza ku ngeri yaanayegeresaamu mutabane obutagema ku bya kuzaanhisa bya mwaninha. Yafuna ekidhuubo.

Yaja ewa mukwano gwe eyali omusawo yaamukoba ati, "Nkusaba ombeereku bambi." Omusawo yaamwiramu ati, "nkubeere ntya, mukwano gwange?"

Maama yamwiramu ati, "Mutabane wange Aberi yeebisa bubi enaku dhino. Yamenhyeku omukono gwa dole wa mwaninha. Tasaaniire kukola atyo.

Enkyo njakumukoba aleete dole y'oliokwizaaku omukono gwe.

"Okoba Aberi oti ateekwa okukusasula olw'omulimo gwo. Azira sente, n'olwekyo oidha kumukoba anaaze emotokayo enene etera okubaaku enfuufu." Atyo maama bweyakoba.

Mukwano gwe yaseka yaakoba ati, "Eeee! Ekyo kiidha kuba kirungi."

Maama wa Aberi yairayo ewuwe. Yaabuuza Aberi ati, "Bwoba omulwaire oba nga olumiziibwa, oja gha?" Aberi yairamu ati, "bwemba omulwaire oba nga nnumiziibwa, nteekwa okuja okubona omusawo." Maama wa Aberi yaakoba ati, "Walumya dole, kale oteekwa okummutwala y'omusawo."

Atyo Aberi yaatwala dole y'omusawo. "Dole yalumizibwa inho. Maama wange yankobye mmukuleetere. Musawo, oghanga okumugha omukono ogundi?

Omusawo yaganha okulabirira dole. Era yaghanga okukola omukono omuyaaka.

Omusawo yakoba Aberi ati, "Dole buti alina omukono omuyaaka. Oteekwa okunsasula. Olini sente imeka?"


Aberi yairamu ati, "Musawo bambi, Nzira sente waire. Tighanga kukusasula olw'omulimo gwo'okoze."

Omusawo yaakoba, "Kale! Ozira sente waire? Emotoka yange enene ngubbu inho. Yondha emotoka yange, era otyo bwoidha okunsasula."

Aberi yatoola akalobo ak'amaadhi, n'akagoye akayondho. Kyamutwalira ekiseera kinene okunaaza emotoka eyo eyali engubbu.

Agho Aberi yairizaayo Meeri dole. Meeri yasangaala era yaakoba Aberi ati, "Oli mwaninhaze mulungi. Weebale kulongoosa dole wange." Aberi yaamwiramu ati, "Mwaninhaze, neetonda okusungughala n'okukunakuwaza."

Okuva kwolwo Aberi tiyairamu kutwala bintu bya mwaninha. Era yakolanga bulikisoboka obutamusungughalira. Aberi yali aidhukira okunaaza emotoka ey'omusawo eyali enene ate nga ngubbu bwe kwamutwalira ekiseera ekinene. Yasalawo ati bw'osasula otyo ku lw'okusungughala n'okumenha ebintu, oba osawire kinene inho.