Emyaka mingi ejaabita, ku kyalo kye Bulyamba, yaliyo omusaadha ye bayetanga Kiyungu. Kiyungu yayenda nga okulya inho. Okusingira irala okulya emamba.

Lwali lulala, omukulu w'ekyalo yaayeta abatyamye ku mbaga ya mutabane.

Awoni Kiyungu yaawulira abantu nga boogera ku mbaga eyindi. Yali ku kyalo kya kumpi nga bakyeta Kasumbi.

"Mikolo ebiri ku lunaku lulala!" Kiyungu yeeloghooza.

"Nteekwa okuja ku mikolo jombi," Kiyungu yaakoba. "Ndisooka kuja katumbi me ndire e Bulyamba."

Kiyungu yawuunha munconco yaaja ku kyalo kye Kasumbi. Bwe yatuuka yaabona nga abafumbi baka fumba emere.

"Ndh'a kusooka ndireyo e Bulyamba ndire wano luvainhuma," Kiyungu bwe yasalagho.

Kiyungu yairayo e Bulyamba nga asuubira okwagaana emamba ng'eyiire. Aye bwe yatuuka eyo yayagaana abafumbi boona baakafumba emere.

"Weenaviiriire e Kasumbi baabaire batandise okufumba," yeeloghooza, "Emere eteekwa kuba ng'eyiire." Kale Kiyungu yairayo e Kasumbi.
Buti endhala yali eri kumuluma inho.

Kiyungu ghe yatuukira e Kasumbi nga abantu bamaze okulya. Abageni baali bali kuwa omugole omukazi n'omusaadha ebirabo. Kiyungu yali azira kirabo. Yali iye ayenda bwa kulya bulye kyonka.

Kiyungu yaanholwa olw'okufiika emere. Yaasalagho okwirayo ku kyalo kye Bulyamba. Buti yali muyala ekiswise nga mukoowu era yaatambula mpolampola.

Bwe yatuuka ku kyalo kye Bulyamba, abantu baali bali kwemba na kukina. Baali baliire emere bagimazeegho!

Bwe yawulira ati ghazira mmere naire, Kiyungu yaazirika. Yali asubiibwa emamba mu mikolo jombiriiri. Weyairira engulu, yaafunayo otubuugi mu kakopo akatono yaanhwa.

Kiyungu yairayo ghaka ghe nga akaali muyala muyalabanu omunhugubavu.