Ho bhoono Yëësu yaabharëngëëyi ëkërëngyö igha, "Yaarenga‑ho umwamë uwöndë, ono ömöghöndö ughwaye ghwaamirë bhököngʼu omooka nyabhorebhe.

Akaibhöörya mo‑motwe ughwaye igha, 'Kana iyakë nkaakora? Teneena ahasë aha okotoora ibhyakorya ibhyane, bhyangʼana hano!'

Mbe, akaghamba igha, 'Nendataabhore ebhetara ibhyane bheno, nkore ebhetara ebhenene okokera bheno. Ntoore‑mo ibhyakorya ibhyane bhyonswe igho na ëbhëntö ibhyane ibhyëndë.'

Mare ngambe mo‑nkoro iyaane igha, 'Bhoono mböökirë nikaayë. Tigha nikare muunye, ndaagherenga na ukunywa, nshömëëywë.'

Kasi, Waryobha akamötëëbhya igha, 'Uwe örë mokangi tomanyirë nu‑bhutikö ubhwa reero oraakwe! Bhoono ëbhëntö bhiyö waaibheekera ni‑bhya wë bheraabhe?'

Yëësu, akamarërrya ko okoghamba igha, "Ni‑igho erebha kö‑möntö ono akwibheekera ëbhëntö, kasi aanga ukwibheekera ku‑Waryobha."

Ho Yëësu yaatëëbhëri abheegha abhaaye igha,
"Ko okoghera iya ghayö, ndabhatëëbhya igha, motakaahaha na ukwibhöörya igha, 'Hai toraanyoore ibhyakorya, handë igha nkë toraatoore?'

Kana mwëbhirë igha, öbhöhöru ubhwënyu mbökërrë ibhyakorya, na ömöbhërë ngökërrë singibho?

Momaahere ko‑manyamoko. Teghaana ömöghöndö ughwa ukwëmya, handë ughwa okoghesa hë, teghaana eketara hë, handë ahasë aha okotoora ibhyakorya. Kasi Waryobha nköghasumya arë ibhyakorya. Bhëënyu mökërrë ibhinyönyi ahare iyö.

Taaho ömöntö mö‑bhëënyu, ono ehaho iyaaye, araakore ëngëri öbhötambë ubhwa öbhöhöru ubhwaye. Mbe, ko bhono motakotora okokora ëkëntö ekeke kya kiyö, n‑kwakë mokobha na ehaho iya amangʼana aghandë ghayö?

Momaahe amauwa kya bhono ghakomera. Teghakokora emeremo hë, teghakwishonera singibho hë. Kasi ndabhatëëbhya igha, kora omokama Suremaani, ko obhonene na ubhwamë ubhwaye, tiyaarë na singibho sinshiiya kya ëkëmörë ëkëmwë ikya ëbhëmörë ibhya mu‑risisi. Mbe, oraanyoore igha Waryobha ni‑igho akwibhöhya amanyanki agha kö‑möghöndö, ghano igha reero ho gharë, kasi isho ngaretabhutwa mo‑morro, bhoono tabhaibhöhi bhököngʼu bhëënyu bhanyamukumo omoke?

Bhoono bhëënyu motakaanyanka ukwitegherra igha, 'N‑kë toraare?' handë igha, 'N‑kë toraanywe?' Motakoorekera ghayö. Motakaabha kya abhantö bhano bhatamanyirë Waryobha. Ko bhoora abhantö bhano bhatamanyirë Waryobha, ghayö ngo ghakobhahahya. Kasi bhëënyu, Suwëënyu uwa mu‑ryobha, namanyirë bhuuya igha, nkoghatuna mörë.

Ku bhuyö mokore ghano Obhokama ubhwa Waryobha bhukutuna, na kora aghandë ghayö bhyonswe igho, naraabhahaane."
Ruuka 12:16-31