Urusikö nyabhorebhe, Yëësu yaasaasaamanga Waryobha. Hano yaamarrë, ömwë uwa abheegha abhaaye akamötëëbhya igha, "Uwe Omonene uwëëtö, utwëghi bhono toraasaasaamenga Waryobha, kya bhoora Yohana Omobhatiisya yëëghya abheegha abhaaye."
Yëësu akabhatëëbhya igha, "Hano mwasaasaama Waryobha, mosaasaamenga igha, 'Taata, iriina iryaho, rëhörëëribhwi. Obhokama ubhwaho bhuushe. Otohaanenga ibhyakorya ibhyëtö kera rusikö. Utwabhere ëbhëbhë ibhyëtö, kya bhono tukwabhera bhano bhakotosarrya. Otakaatohatërrya mo‑mashaashyo.' "

Ho Yëësu yaabhatëëbhëri igha, "Toghambe igha, hano ömwë wëënyu araaghi wa mosaani uwaaye, mu‑bhutikö ghatë, na amötëëbhi igha, 'Mosaani uwaane, tangʼaana‑ko hayö emekaate etatö. Mosaani uwaane yaarë na roghendo, ahëkëëyë waane hayö, na mbe teneena ibhyakorya ibhya okomohaana hë.'

Kasi omosaani uyö amohonshore igha, 'Tigha ukunnyankya. Öni marrë kusiika‑ho, nëndaayë na abhaana abhaane. Tentore okobhooka nkohaane ëkëntö kyokyonswe igho hë.'

Ndabhatëëbhya igha, nokaanyoora igha ömöntö uyö taabhooke ahaane mosaani waaye uyö omokaate, ko bhoora igha m‑mosaani uwaaye, kasi bhoono, naraabhooke amohaane keno akutuna, ko bhoora mosaani waaye uyö, atakukwa omotwe okomosabha.

Ku bhuyö Yëësu akaghëndërrya okobhatëëbhya igha, mosabhenga Waryobha keno mukutuna, naraabhahaane. Mutunenga, Waryobha naraabhatöörrii munyoore kiyö mukutuna. Mokongʼontenga ko‑kesaku, Waryobha naraabheghorre‑ho. Ko bhoora ömöntö wowonswe ono akosabha Waryobha keera akutuna, Waryobha nkomohaana arë. Ömöntö ono akutuna ëkëntö ku‑Waryobha, nkunyoora arë. Na ömököngʼönti uwa ekesaku, Waryobha nkumweghorra arë ho."