Saa laa bedǝ zauro kurwowuzǝna, kuru fǝram ye kurwowuro walwono. Adǝro, kǝmaduwuwa samma hargada, illa Kǝmaduwu Bargabe nguron, shi harzǝnyi.

Dabbawa samma ngudua daji shawariro sapkata.

Kalimo shima burwo [hawullan] manazo, "Ande sammaso zaumaro nguduaro notǝndon mbeji, kuru kǝmaduwuwa sammaso harzana, Kǝmaduwu Bargabe nguron. Amma shi ye zaumaro cintǝn, abigǝle diyen?" Wono.

Fǝrye shawari kaino, "Laanndedǝ raksa Kǝmaduwu Bargaabero lezain. Nji sasaiya daji laandero sawudǝ."

Feye zaawu kaino, "Kǝmaduwudǝ zaumaro cintǝ. Sa waltiyennan, sandi ngawon koltǝnadǝ ronzayero waljonode," Wono.

Dimiye "Mbaa! Mbaa! Kǝmaduwu Bargaabero lenge nji yakin," Wono.

Kanyiye yollotǝ samiro fartǝgǝ duwo "Mbee! Mbee! Wu ye Kǝmaduwu Bargaabero lengin," Wono.

Kuwiye "Keer! Ker! Ker! Wu ye Kǝmaduwu Bargaabero lengin," Sǝ gulji.

Dabbawa samma lezaiya saragǝna. Kalimo fuwu gǝrwono.

Nadǝro letǝdǝ awo kǝskengǝyi. Kaji shima batadǝn daryewo. Shiye wono, "Sawanyiso, range Kǝmaduwu Bargaabero leyinba," Sǝ gulji.

Daji Kuwiye Kajiga cindo.

Letǝnza gozaga kowada. Kuwiye wono, "Martǝgǝnowo, wu mbarǝkǝna, range Kǝmaduwu Bargaabero leyinba," wono. Dimiye Kuwiga cindo.

Letǝdǝ gozaga kozanan, Dimi ye kuruman sǝmbari.

Dimiye wono, "Mbarǝkǝna. Kǝmaduwu Bargaabero letǝdǝ tǝmmaro raakǝnyi," wono.

Kanyiye Dimiga sǝndi.

Cintǝn gǝnyi, Kǝmaduwudǝro letǝ gowom kotǝro, Kanyi ye taidazǝ sǝmbari. Fǝrye sawartǝ Kanyiga cindo.

Sa Fǝrdǝ ye Kǝmaduwudǝro letǝdǝro zaumaro sǝmbanaro walwononya, shiga Feye cindo.

Darye dajiramro sa Feye letǝdǝ gozǝgǝ kojinbaro walzǝnan, Kalimoye kalaktǝ daji shiga cindo.

Dabba tilonzǝ long gapsoro walzǝnan, Kalimoye dunonzǝye sǝdǝ, daji Kǝmaduwu Bargaabero najiwo.

Daji Kalimodǝ taidazǝ sǝmbarǝnan daryelaro kadio.

Kǝnshe kallan, Kalimo lattǝgǝ bowononya Fega yulokkono.

Feye Fǝrga yulokkono. Fǝrye Kanyiga yulokkono.

Kanyiye Dimiga yulokkono. Dimiye Kuwiga yulokkono. Kuwuye Kajiga yulokkono.

Daji adǝ shima futu Dabbawa samma ngǝnǝpta Kǝmaduwu bargaaben nji sasana wo.