Tene, tene vyũ kwaĩ sua mwonza.

Myalĩ ya sua isu yatumasywa nthĩ ĩvyũva mũno mũvaka andũ mayaĩ momĩĩsya ũvyũvu ũsu.

Kwou imwana mwonza sya mbaĩ yeetawa mũnda nĩmavangie kũũa sua isu.

Nĩmathie na moaa sua thanzatũ.

Sua ya mwonza nĩyevithie uungu wa kĩĩma.

Sua yathũa nĩkwethĩiwe na kĩvindu.

Nzia ndyaĩyona ngo, nzou nayo akinyangaa mĩtĩ natwo tũvalũkũ twatembea ĩũlũ wa mĩnyambũ na kwaĩ na kĩvũsavũsany'o kĩla vandũ.

Nyamũ nĩsyethĩiwe na mũkutano nĩkana ivange ũndũ ikwĩka.

Kavalũkũ nĩkamatavisye ĩũlũ wa sua ya mwonza ĩla yevithĩte uungu wa kĩĩma.

Ĩndĩ nũũ ũla ũtonya kwĩta sua ĩsu?

"Nĩngwĩta sua ĩsu," mũnyambũ nĩwaisye, nũndũ nĩwe waĩ mũsumbĩ wa kĩtheka.

Mũnyambũ nĩwauumie asya, "Sua, sua, vatonyeka ndũkasembe ũtwĩvithĩle. Syoka ũtũmulĩkĩle."

Ĩndĩ sua ndyĩamwĩthukĩĩsya.

Nzou nĩwe waatĩe kũnena. Nĩwokĩlilye mwendende wake na avuva soo akyasya, "Sua, sua, vatonyeka syoka."

Ĩndĩ sua ndyĩamwĩthukĩĩsya.

Vikoko na wanake wake nĩwasũngie na esũvana, "Sua, sua, vatonyeka syoka." Ĩndĩ sua nĩyaleile kumalũka na ndĩamethukĩĩsya onthe.

Mũminũkĩlyonĩ Nzamba nĩyaisye nĩkwĩta sua. Kĩla mũndũ nĩwathekie. Ĩndĩ nũndũ mũnyambũ aĩ mũtongoi mũseo nĩwaisye, "Nzamba nĩwaĩlĩte kũnengwa mwanya wa kũtata."

Nzamba nĩ wasongie mbee na kwa ũuu asya, "Kookoo koo-koo."

Kĩla mũndũ nĩwaseng'ie nũndũ sua nĩyaumĩlile vanini uungu wa kĩĩma.

Nzamba nĩwaisye ĩngĩ kwa ũkũmbaũ, "Kookoo! Koo-Koo." Sua nĩyaumĩlangile ĩngĩ ĩũlũ vanini.

Nzamba nĩwaisye ĩla ya katatũ na waasya mũnene na ũkũmbaũ, "Koo-Koo! Koo-Koo!"

Sua yambata ĩũlũ na yakenũka. Nyamũ syonthe sya kĩthekanĩ nĩsyew'ie mũyo na andũ namo mew'a mena ũthasyo.

Nyamũ sya kĩthekanĩ nĩsyeiy'e andũ mekatate ĩngĩ kũwaa sua na andũ metĩkĩla.

Kuma mũthenya ũsu nzamba yasya kĩoko sua nĩyumaa na ĩkamulĩka matu.