Khale elia, eshiro shishialolekhanga mu lukongo lwabu Opio tawe. Abandu bakonanga nibachonyire, ne bakholanga emirimo nibakhabuukha.

Inyanga ndala, Opio yatsia okhuyiima ne tsimbwa tsiaye. Mu fise fititi, tsimbwa tsianza okhutafia eshichwaya. Opio yatsilondakho. Yerukha khulwe efise efinji muno. Olwa yalola niyakhachonya, niyekhala hasi, aulukhe. Niyakhachonyolokha, ne khandi abuukha alondakho. Ne shiyanyoola tsimbwa tsiaye tawe.

Inyuma we tsinyanga tsinyinji, yola khwitala. Yatsia khu ndala ye tsinzu mwitala omo, naboolera mweneyo ari, "Ndatafiye eshichwaya khulwe efise efirambi mana enjonyire muno. Ndikomba okhuulukhakho." Mwenenzu namuboolera ari, "Ikhala hasi oulushe. Wikombakho okhunywa amalwa?" Opio yali nobulo obunji muno kho nanywakho. Ne tsindolo nitsimuyira.

Ne olwa yabukha, shiyanyala okhulola tawe. Yatema okhutimbula nokhutimba tsimoni efise efinji. Efise fititi nifiakhabura, yatema ne yafwanilisia eshifwanani shiomusatsa oyo imbeli weinzu eyo. "Umbere eshindu eshibi okhunywa. Shinyala okhulola obulayi khandi tawe."

Omusatsa oyo namuboolera ari, "Sholikho obubi tawe. Bulano neshiro. Oshiri okhulolakho eshiro efise fino fioosi? Eshiteere nishitsia, neshiro shinjira." Opio nareeba amareebo amanji muno okhulondokhana nende eshiro. Ye nende mwenenzu balomaloma okhuula itsuli.

"Enyala endie okhuirakho eshiro mulukongo lwanje?" Nareeba omwitsawe omuyiakha. "Ndikombakho abandu banje balolekho eshiro." "Tsia khumuruchi wolukongo lwefu luno, alakhuboolera," Omwitsawe oyo namuboolera. Omuruchi oyo naboolera Opio, "Tsia mulukongo lwenyu ingoloobe. Ne olakhupakho amashemo tawe. Nokhupa amashemo, eshirima shilerukha. Ne nochenda notsia busa imbeli, shilakhulondakho."

Opio nakhola shinga yali naboolerwe. Nachaka okhuchenda natsia imberi, khulukongo lwabu ingolobe yalondakho. Yekomba okhulingakho inyuma ne nalakhola ario tawe.

No lwayoola khulukongo lwabu, abolukongo olwo bali nibashiri noburi ninaye. Omusiani wabu namureeba, "Ni bulwale shina buno obwokhurere Opio?"   "Nishindu shiina eshimali shikhuloondakho esho?" Nyakhusenje namureeba.

Opio naboola ari, "Abetsa banje, eshindu eshimali shiamulola shino shilangwa mbu eshiro. Eshiteere nishiula, ne khukhola emirimo. Ne eshiro nishiula, ne khunyala okhuulukha. Bulano muli nende oburi ne khandi siesi ndali noburi endio. Ne mulalola mbu eshiro neshilayi."

Nolwa eshiro shietsa mulukongo lwa Opio.