Edda ennyo bawansolo baali boogera. Era tulaba Wakayima ne Wampisi

Ababiri bano baali bamukwano nnyo.Buli kintu baakikolanga bombi, gamba nga okuyigga eby'okulya.

Wakayima yali mugezi nnyo. Yayigga nga emmere nyingi okusinga Wampisi.

Wampisi yali munafu nnyo kyoka nga ayagala nnyo okulya.Wadde nga baayigga nga emmere yanjawulo, baagiteekanga wamu nga bakomyeewo.

Wakayima yakozesanga obukodyo ebw'enjawulo okufuna emmere era yasooka nga kugiryako nga tanagireeta wali Wampisi.

Mubiseera by'enjala kyali nga kizibu ababiri bano okufuna emmere ebamala.

Ekiseera kyatuuka Wampisi naarekera awo okuyigga ng'alya ku mmere Wakayima gyeyalinga ayizze.Kino kyanyiiza nnyo Wakayima era nekimusunguwaza.Wakayima bweyaddanga nga taleese mmere, nga Wampisi kimumalamu amaanyi.

Wampisi teyalagako suubi lyonna nti oba anakyusa muneeyisa, atandike okukola aleme kwesigama ku munne. Wakayima obulamu bwamuzibuwalira okulabirila Wampisi atalina ky'akola era kwekusalawo anoonye amagezi gonna agamwejjako.

Lwali lumu Wakayima naazukusa Wampisi kumakya ennyo nebayimirira wansi w'omuti basale entoto kungeri gyebasobola okweyimirizaawo.

Emboozi yaabwe yalema okugwa amakerenda nga buli omu alina endowooza yanjawulo.Wampisi yategeeza nga bw'atasobola kubaako nakyakola mbu tasobola kudduka nga Wakayima.Kwekuteesa nti ye asigalenga akole emirimu gy'awaka ye Wakayima ayigge eby'okulya.

Lwali lumu olwegulo nga Wakayima ayigga naalengera omuti gw'emizabbibu emito.Yatuula wansi naakubaganya ebirowoozo kungeri gy'asobola okulyamu emizabbibu gino n'emirala agitwaale awaka.Tekyaali kyangu kuba enimiro yali yetooloddwa sengenge.

Mubugubi obungi, Wakayima yasobola okutuuka ku muti.Yaguwalampa naawanula ebibala bingi nnyo.Yalyaako ebimu kuba enjala yali emuluma nnyo ebirala nabiteeka mu kisero.Olw'omukutto omungi,byamulema okusitula n'asalawo okwebaka era wano nnyini nimiro weyamusangira n'amusiba ku muguwa omuwanvu aleme kutoloka.

Omuguwa gwaali muwanvu era Wakayima yasobola okutambula nadda awaka.Yasangawo Wampisi era naamulimba mbu ava ku kabaga akooye nyo nti era bamumutumye amusibe ku muguwa aleme kubulira mu kubo.

Omusiru Wampisi yasumulula Wakayima era neyesiba ku muguwa olwo n,atambula nga agugoberera, okukkakana nga aggukidde ku nannyini nimiro eyali amulindiridde obwedda n'ejjambiya. Wampisi yasadaakibwa era n'aliibwa embwa za nanyini nimiro.Eddiba lye nerikolebwamu akakookolo akakuuma enimiro.