Yange tso Dwem man Bagu gba anyiman. Kwagh ne hingir ve ayoosu. Tso ve za hen orjir er a za hime ve iyongu.

Orjir ungwa gbang kpa a chia u nan mo ken ave ibo. A hen wen er, "Aluer m na Dwem ibo yo, una va korom ibua una ya. Aluer m na Bagu ibo yo, una va vihim ikyuleke kembe kembe! Tso me er nena?"

Orjir hen sha min gbang yo a kaa a ve er,"Ijir ne taver mo u oron i mo mtswen. Za nen hen mbatamen mba hen ningir wase ne." Tso Dwem man Bagu yem a ijir hen mbatamen.

Ve za or mbatamen zaiyol ve.

Mbatamen kpa ungwa. Ve kpaa ve chia u nan or ibo.

Aluer vea ta kwagh ken Bagu yo, Dwem una ya ve ibua. Aluer vea na Dwem di isho yo, Bagu una vihi ve ikyuleke purututu. Mbatamen kpaa kaa a Dwem man Bagu er ijir la taver ve u oron kpishi.

Mbatamen umbur chankwase ugen hen ningir la. Kwase ne lu a kwagh mom mom ga. A lu a ibua ga, lu a ikyuleke ga.

Ve kaa ayol ve er, "Kwase la una fatyo u oron ijir la a mchiem shio." Ve na Dwem man Bagu zwa er ve za her na.

Mba za nyer hen ya u Chankwase yo ve kaa a na er a or ve ijir. A rumun.
Kpa a kaa er una vande lamen a ve kposo kposo.

Hii hii yo, Chankwase la yila Dwem kaa a na er," We u ngu zege inyamtoho i chivirigh man kpamor kpaa. A er nan u zohon zwa a gbilin inyam u kpeghee er Bagu nahana?"

Chankwase kaa a Dwem wen er,"Aluer ior vea ungwa er we u ngu ayoosu vea Bagu yo, a lu kwagh u iheenegh. De zwa zohon vea Bagu.

"U kaa jighlii!," Dwem rumun a na. "Me wua ijir ne, shi me de ayoosu vea Bagu kpaa."

Shi Chankwase ta ibaregh a Bagu,"We udooashe, u ngu tsev-tsev. Kanyi i dzoughu vea chov-chov kwagh u yan uihoon-mbaakaav human iyol amin er Dwem nahana? Ior vea kenger we nena, aluer ve ungwa er we u ngu ayoosu vea bokwagh ngula?

Bagu kaa er, "U kaa mimi, me de ibumegh."

Chankwase man yila ve uhar cii ijiir imom a kaa a ve er,"Ne uhar cii ne rumun u wuan ijir ne. Yo de nen ase ayol aen kwaghbo."

Ve uhar cii ve sugh ayol ave man ve hime iyongu.

Ikpilaior mba hen ningir la ve ungwa kwagh ne kpiligh ve iyol. Chankwase faityo u eren kwagh Orjir man mbatamen faityo ga yo.