Ũndũ Kĩvindu Kyokie Ndũanĩ Ya Opio
Robert Ekuka
Wiehan de Jager
Kikamba

Tene tene vyũ, kũyaĩ kĩvindu ndũanĩ ya Opio. Andũ makomaa manoa na methũkũma masalũkĩtye.

1

Mũthenya ũmwe Opio aĩna ũtanu mwingĩ nũndũ nĩw'o waĩ mũthenya wake wa mbee kũthi kũsyĩma eweka. Opio nĩwosie makitĩ na aumala ndũanĩ. Kavinda kanini kathela makitĩ nĩmanzĩe kũsembany'a nzaaĩ. Opio nĩwamatĩĩe na asemba kĩlungu kya masaa maingĩ. Anoa nĩwathũmũaa na ĩndĩ esemba ĩngĩ. Ndaona makitĩ make.

2

Ĩtina wa matukũ maingĩ nĩwavikie ndũanĩ yaĩna andũ anini mailye mbee wa nyũmba syoo. Nĩwendie nyũmbanĩ ĩmwe na eea mwene, "nĩsembanĩtye na Nzaaĩ ĩvinda ĩasa mũno na nenda kũthũmũa."Mwene nyũmba nĩwaisye, "ĩkala nthĩ ũthũmũe. Nũkwenda ũkĩ?" Opio nĩwew'aa waũni mũno kwou nĩwanyuie ũkĩ na akoma.

3

Akũkĩla ndonaa nthĩ. Nĩwavingũie na kũvĩnga metho make mavinda maingĩ na anzĩĩa kwona ũla mũndũ ailye mbee wa nyũmba. Nĩweie mũndũ ũsu, "ũnengie kĩndũ kĩthũku mũno; ndĩkwona nesa."

4

Mwene nyũmba nĩwamũie, "vaĩ kĩndũ kĩthũku naku. Oyu nĩ ũtukũ. Nũndũ ũtoona ũtukũ. Mũthenya wathi, ũtukũ nĩũkaa. Twĩthĩwaa na masaa ĩkũmi na elĩ ma ũtukũ. Tũthũmũa ũtukũ na twĩthũkũma mũthenya. Wĩkalaa va? Ndũanĩ yenyu ndĩ ũtukũ ĩĩ?" Opio nĩwakũlilye makũlyo maingĩ ĩũlũ wa ũtukũ nũndũ nĩwendie ũtukũ mũno. Ndaakoma ĩngĩ; manenie na mwene nyũmba mbaka kwakya. Opio nĩwendie kwĩkala mũthenya ũngĩ nĩkana one ũtukũ ũkũka ĩngĩ.

5

Nĩwakomie mũthenya na okĩla ũtukũ ũtanavika. Nĩwakũlilye mwene nyũmba amũtavye ũndũ ũtonya kwĩka nĩkana atwae ũtukũ ndũanĩ yake andũ make matonye kũwona. Opio nĩweiwe athi okone sivũ.

6

Sivũ nĩweie Opio atembee athi ndũanĩ yake wioo ũla waatĩe. Ndaĩlĩte kũsisya ĩtina nĩkana ũtukũ ndũkasyoke. Opio nĩwekie ũndũ wataviwe na anzĩĩa kũtembea aendete ndũanĩ yake. Nĩwendaa kũsisya ĩtina ĩndĩ ndatata kwĩka ou. Nĩwendie mbaka anzĩĩa kwona ndũa na anyanyae make.

7

Mona Opio andũ ma ndũa nĩmakĩie. Nĩmanzĩĩe kũlonza makwasya, "ni kyaũ watwetee, Opio? Kĩndũ kĩĩ kĩkwatĩĩe nĩkyũtũaa. Kĩĩ nĩ kĩvindu kya kyaũ kĩkwatĩe?" Opio nĩwaisye, "anyanyawa, kĩvindu kĩĩ nĩ ũtukũ. Mwĩna vw'ĩa; onakwa naĩna vw'ĩa."

8

"Kyeni kyooka notũthũkũme naw'o ũtukũ wooka tũkũthũmũa."

9

Na ou nĩw'o ũtukũ wokie ndũanĩ ya Opio.

10
You are free to download, copy, translate or adapt this story and use the illustrations as long as you attribute in the following way:
Ũndũ Kĩvindu Kyokie Ndũanĩ Ya Opio
Author - Robert Ekuka
Translation - Anna Kula
Illustration - Wiehan de Jager
Language - Kikamba
Level - Longer paragraphs
© African Storybook Initiative 2014
Creative Commons: Attribution 4.0
Source www.africanstorybook.org
Original source