Ndra drio nyaku ni nga ovuzu o'di ri si, 'be 'wara 'wara 'diyi a'bu ndra yi nyaku ma dria balangiti le. Pati ezu ezu 'diyi enga ndra yi 'bua iriti be ogogo.

Nyaku o'di 'da ndra a'bule azi inibiricici, cucu azini ndrundrulu ambiza ru 'dile ni i.

A'bule nde ma etia ele ori azini yi ndra iri ci. Alu ri ma rua oli ndra I ose ose, o'be i nzi nzi kori kori, te azi ri ndra ini nde were dika eri ndra rua be akazaru menya menya.

O'du alu, oli azi ambo akuku ru ri nga li onzi onzi. Ovi aso angu kpere a'bule 'da ma etia vaa 'dale. Yi ele ri awa I ma ale sawa were si ra. Fe ori ele 'da yini angu nyaku ma dria amve 'dole ndrizaru, wura yi be ndu ndu, dika afa o'bale 'biko pie 'diyi nezu ra. Yi 'da ni tro i opizu vile ra ti, ori iri 'dayi avini nyaku ma ndrita yini nele 'bo ri ma e'yo ku.

"Ama eco ni a'a 'bile inicici, ambiza 'di ma alea dika ku." Yi e'do o'yo yi ma eselea. "Le ama ma tu nga uru nezu nyaku ma dria 'dale adini yari." "Ama te nga a'a nyaku ma dria ngoni ru? Ori gaa ri nga zi. "Ama nga ama ose ageti si ya?

"Aria 'bua 'diyi econi nga ama ogu ama ni ovu ele yi ma palaa ri si ku." Eri ma agyi nga omvi eri ni."Ama ose vini nga ama ageti si ku, ama nga aci pa si." E'yere e'yere, ori iri 'diyi ayu eyi ma ale ra. Yi e'do esaa tualu diza amve ri vu.

Yini 'yeria eca ria yi dria leru e'yo azini osutaa ru ni nga I 'ye ni. Yi ma so'bi ma drile awa yi iri-o'du pa pie azini pa anzi pie. Yi ma dri vu le ru si wu azi ni yi ezo iri dri pie azini dri anzi pie.

Yi ovu ni di ori ni dika oku, te yi eca agupi azini oku. Yi ne yi milea milea, yi esu yi le eyi saa ru.

"Ama di nga ama ma aku si oni dria le ru. O'biti alu alu si ama nga etu ne eri ni ega ria ci, dika ama nga etu nde yu." "Ama nga ase ma ta mba pati yi pie", agupi ru ri nga 'yo ra. "Dika ama nga ovu agyi ru aria pie azini anyapa asea 'diyi pie dria."

"Mi emu," agupi oko ri nga 'yo ra. "Muke, ma emu ra," oku oko ri nga omvi ra. Yi nga di mu aci tualu nyaku yini o'di ri ma alea.