Olwolire nga ŋabaaŋo eyo omusinde n'omuhasi wuwe. Omusinde oyo n'omuhasi wuwe nga basaala omwana muhaana nga bamuguliha baati Mulongo. Mulongo gaali deerwa era gamenyanga n'abasaaye babe hu hyalo ehi balanga baati Budongo. Lulala nyina ya Mulongo gamutuma ohuja amaaji hu sobere.

Ni gaali n'atiina nga gagaana abameeri babe abaali ni batiina ohutenya ekwi mwideŋo. Mulongo gendire atiine ni nabo. Olw'ehyo gabaloma bamuhuumireho mu hiŋolu hy'omutumba, asooke aŋirire nyina amaaji aga gaali n'amutumire agobole atiine ni nabo mu kwi. Coka abameeri babe nga baloma baati baali beyuna.

Nga Mulongo abaloma ati, "Kale. Nabagaane mwideŋo." Ng'aŋo Mulongo aŋiitaŋitaho atiina hu sobere, adaŋa amaaji ng'agaŋira engo ahena atiina mwideŋo ohwendula abameeri babe.

Mu hutiina galonderera ahagira ahaali ni hehirira erwabi. Ni goola hu lwabi nga gambuha engereha, nga gagaanayo obugira obwene obungi. Nga himuhaya ohumanya hagira hi ahabameeri babe baŋambire.

Geemeerera aŋo ohuhena ahimanga n'ahyetegeeresa ohubona hagira hi ahanaŋambe. Oluvanyuma gangalaho halala hubwo ahaali hu muhono omugooda. Ng'aŋo agenda, agenda, agenda coka ndigagaana bameeri babe. Ehyaŋwamo ng'ademba gehala mu hiŋolu hy'omusaala aŋuumule coka n'atamanyire n'aŋa ali. Olwohuba gaali adembire, ero lyamuŋamba ng'aŋenyuha.

Ni gasisimuha, owiire bwali bwirire era ng'abona aganamunyu ni gamweswanigirihise. Hino hyatiisa bugali Mulongo era ng'atandiiha ohulira. Omwoyo gugwe gwatandiiha ohuhubba n'amaani n'amagulu nga gatandiiha ohumutengeta. Gaali agesyaho ohuduluma aye aganamunyu gala agaali njala ndigamuganya.

Gulala hu ganamunyu ago era ogwali ogubbala gwamwo nga gumuloma ataduluma, siganamulye. Aye nga Mulongo agegayirira n'agaloma ati, "Mundehe tiine engo!"

Coka aganamunyu gaŋira Mulongo mu nyumba yaago mwideŋo eyaali echafu ni yijuuye amagumba n'esoŋera ni jigungumuha. Nga Mulongo gerambaasa ŋaasi gefuula aŋenyuha.

Mu hirema, gaŋulira aganamunyu ni gateesa, ogulala ni gubuusa guuti, "Omuliro guŋambire? Amaaji gachemuhire?" Ng'ogundi gugobolamo guuti, "Hiisi hiitu hiri bulaŋi. Muleete?" Agandi nga galoma gaati, "Yee! Muleete efe enjala etuluma!"    Gaali getegehire ohuhwehwesa Mulongo ohumutusa mu nyumba. Nga n'ogundi gwosi guloma guuti, "Hiisi hiitu hitereeye." Ng'aŋo nindi ogundi gubuusa guuti, "Humuleete?"

Ng'aŋo ogunamunyu ogubbala gwamwo guloma guuti, "Bahyange musoke mulehe!" Gwali guhebuliiye eteeka lyago eriroma liiti ŋabula Namunyu owali n'ohulya omuutu n' n'atehereeye hulanga abanamunyu bahye boosi balyaho. Olw'ehyo ogunamunyu ogwo nga guloma guuti, "Ale ewe muhasi wange tiina ewenywe olange abahwe baaje." Nga guloma ahaŋere haamwo guuti, "Ewe tiina olange abaganda babo n'ababojo babo." Nga guloma abaganda bagwo guuti, "Enywe baganda bange mutiine mulange abalebe beefe n'ababoojo beefe abasigaayeyo baaje. Ese nasigale ŋano n'ahuuma ehyohulya hy'efe hino. Muŋuliiye?"

Ng'aŋo hiisi Namunyu aŋamba engira ohutiina eyi bamutuma aye ogunamunyu ogubbala nga nigwo gusigala ohuhuuma Mulongo. Nga ogunamunyu ogwo gwihala mu mulyango gw'ehisisira omu Mulongo gaali. Mulongo nga geholesa ati afiriiye mwiro aye n'abonera ogunamunyu mu bwoya. Gasigala n'agulengereeye ohwola olu gwatagiha ohuŋongera ero lyaguŋirira erala. Yino nj'eyali ekabi ya Mulongo ohweyiba coka ehyahabi ogunamunyu nago gwali guŋenyuhire ŋagati mu mulyango.

Mulongo gaali n'ehyohuhola hirala. Era ehigahola hupuluha mulundi mulala ng'atuuma abita hu mugongo gw'ogunamunyu, ng'aduluma eja kafuufu.

Nga ŋaweene aŋo aganamunyu gala agandi gagaluha, nga gabona ehyali ni hibaayeŋo. Nga gamutaho embiro gatagiha ohumubbinga, ni gahayuha olw'obusungu n'ohunyolwa.    Coka mu hiseera ehyo gaali sigaŋanga hu muŋamba.

Ni gaali ni goleeresa hu hyalo hy'ewaawe, mulala hu bohuhyalo ehyo gamufania ng'alangirira n'aloma ati, "Mulongo, Mulongo nj'ono gaaja." Semwana ni nyina nga baduluma ohuja ohumusangaalira ni beyaasa Hiwumbe ohuŋonia omwana wawe. Nga bamuloma baati, "Mulongo, Mulongo, hwali huŋeega huuti ofuuye!"

Ohuŋwa omulundi ogwo, Mulongo n'abaana abandi sibatiina mwideŋo boŋene.