Zamva azi ndra alu, 'ba eri omve Ojua 'i. Eri ndra o'a ima ti'ba be enyati Ocoko a O'du alu, Ojua ma adri pe eri ma ti yi eji a'bulea.

Eri ni muria geria, fudri ima agii be. Eyi mu jerea eja tra. Ojua le mu eyi pie. "Kirikiri, emima tee ma pati asaro 'di ma etia!" 'yo eyi dri. "Ma nga mu yi ebi ma adri ni." Eri ma agii leeni eri tee ku.

"Onzini yo, ma emi esu jere alia ra", Ojua 'yo eyini. Nzu ongu si yi ebi ji andri vu. 'Da ma vutia, bi 'ima agii ma vuti jere alia le.

Bi geri mupi yia ri ma vuti. Yi ma kala 'daru si ri ma dria, geri awa 'i ndu ndu tre. "Geri ezoanji 'dii ni biiri ngo 'i?" ora 'i dria le.

Pe gerii wala ri ma vuti bi 'i. Mu, mu, mu saa ezu, te esu 'ima agii ku. Ande tu. Asi ri pati azi ma etia avali. O'du 'be eri 'dasi.

Ojua kamu enga 'bo, angu bi tu. Ini alia, mile azi alifu alifu ru eri lu. Obau cee eri kurumu. Ori ni eri ndezu turi si, econi owu ku. Le 'ye apa, te obau 'dii ce eri omba be kurumu.

"Mi olo mi ku," obau ambo o'duko be ombaru ri 'yo erini. "Ika apa, ama mi nya ra." "Kirikiri, ikuu ma, ma mvi akua," Ojua a'i eyi.

Obau 'dii 'duu kani Ojua eyivile akua oje alia – jo azi ondi ru, foloko onyu ni anga zu drinia 'dii be. La'i va, 'ye 'i o'du ko.

Ini alia, eri obau 'dii e'yo nze eyi ma eselea. "Aci 'bani odu 'di ngoni?" obau alu zi. Yi e'do a'di 'bo?" "'Ba otu afa woro 'bo." "Ma eji zamva nde ri 'i?" "E, e!" obau azi 'dii omvi. "Abiri nde 'dole ama 'bo!" Lee Ojua ji amve jo aliari si."

Obau ambo ri 'yo, "Ma agii, emi ma tenga. Emi ma ega azitaa enyati Amani 'di vile ri. Obau alu nya nyaka a'dusi ku. Le ama ove aku azi 'dii nyaka nya ama be." "Ma mu ama andripi omve," eri ma oku 'yo. "Ma mu ama atapiru ma anzi omve," oba werea ri 'yo. "Ma mu ama adripiyi omve ama amvupi be," azini 'yo. Ma te vile 'de nyaka ma agai te.

Obau ambo ri 'yo. Ri kaatia obau azi 'dii ne mu geri ndu ndu si. Asi 'dale saa azo ru, obau ambo ri e'do o'du ko acitia. Saa were vutia, e'do ondroko se. Ojua ma drileba eca ni. Te eri nga fu ngoni ngoni ru obau ambo ri ma agaia si? Eri ambo ru tu, atri jotile ci.

Geri ci ri alu. Mbu uru obau ambo ri ma ngukua si, apa ongule eri ma pani ecozu eri jizuri si.

'Da ma vutia, obau azi 'dii eca ci. Nee e'yo 'i'yepi ri. Nzu eri ma vuti si, eyi di agbo si omba si. Zamva apa te.

Eri ni 'e ca enyatiaria, agu enyatia 'dii nii eri ra, ngaa tre, "Ojua, Ojua ni emu 'da." Eri ma ati efu amve eri ma andri be eri zi agate si, fee awa'difo O'baapi dri eyi ma zi ma tambazuri si. "Ojua, Ojua, ama ega mi avi mi idri ra!"

E'do zu o'du 'da si, Ojua pi anji azi 'dii be da dri oje alia 'dale a'dusi ku.