Kolong ang'orot, ayei ekatan ka aberu. Ayakatar kesi ikoku nisapat ni anyaritae Kisirusiru.

Apei kwaar niti iyokii kisirusiru ng'akinei, abu akine tochil eworu keng lo erarum. Tomea itokeng ng'esi akigiel emutuu lodonyet eworu. Abu Kisirusiru togiel emutuu anierumor kiwaak lopuko lo eworu keng alo erarum.

Apak na alosio ng'esi nawi, abu toriamu ng'isapa eboliasi epira lo ang'akejen, toloma ngesi dae tobolia dio emutuu ng'olo tachakar alopuko tong'op.

Ani enang'i nawi, abu tolimok itokeng ng'akiro na apotu tosubakin. "Edia-kang," tonyara itokeng ng'esi, "monan, toremok emutuu nakaratas toting'ia." "Dir toto, ayen tokona," tatachu Kisirusiru. Akwaar nache, abu edia tolemu agulu kiwoko aokunio ng'akipi. Kitam ngakiro nakolong alimokinit itokeng dio akibur agulu a akaratas kiwokorea nawi. Aloroto, abu akaratas tochil dio agulu tochakakini kwap tobwang'abwang'aar kiyesar ng'akipi.

Ani edoli ng'esi nawi, abu itokeng tolimok ng'esi tama, "Ikadia monan, kiwok agulu anakoukon nyeebukor ngakipi." "Dir toto, achoiya ayong," tatachu Kisirisiru. Akwaar nache, abu apakeng tolimok ng'esi atamar toruja ng'akinei lonyia. Kitamu ng'akiro nakolong alimokini itokeng dio akiwok akine aakou! Kipetapetakin akine togwar akou a Kisirusiru toleleasi ng'aakot koop ereet.

"Wori ipalikinia iyong abang'aanut?" kikilau apakeng. "Eeneneo ng'akinei dio torikoroe a auno. Pe kisub iyong ng'akiro aosou irotokini iyong a nawo kana." Akiwalaret akwaar anache, abu ekile tomea lokookeng akigiel akiring alomakit. Itamunit ng'akiro nakolong abala apakeng, abu Kisirusiru toen akiring a auno kiria nawi, tamataror lokojokon niebur apakeng akidarit ng'esi.

Tatamaki mono iyong, ekoni akiring ng'ina edoli nawi ai? Tong'oo apakeng lokojokon tolimok ng'esi atamar toen eegos keng taramak. Na eiraria itokeng ng'akiro ng'una, abu ng'esi tolimo akirukor ka lokookeng. Apotu kechi tolemasi ekidor lo akai anakipoet, kisiakineta monan adukokinia akai nakitetet ani elose.

Apotu kechi toloto nikooyen nyeanyuna ni edukete akai. Ani eribokini, totiakut adokar lokitoe akiper.

Nacha adokareta lokitoe kona, apotu kiirasi echale alokwap. King'olikis ng'ikiliok ng'ikankapei eting'ito ng'ichwei. Tobul kechi dio talakakis ekidor tachakar kwap. Tochakakin ekidor nalup tobul ng'ikiliok kipung'aros kimiekis eegos kaneni.

Todokut Kisirusiru ka Itokeng kwap ekitoe. Na anyungareta ngichwei, apotu toriamut ng'aropiyae, ng'iworui, ng'iburankito ka ng'iboro daang ludukiet Akai. Apotu nabo toriamut nidukokina akai ka akilomo niajokon a alakar akidwang nikolong.