Ndra drio agu azi ci je ima oku ra, te yi esu lu yima mva alu. Yi 'da mva nde ma ru Azabo i. Agu nde pi ndra ima oku ni be ndri pi yi oce ti pie.

O'du alu Azabo ni ndri yi ofuria amve, ndri azi alu ri ma o'yu ce eri ma sati. Andri pe tini mu sindani je dukania sati nde sozu. Azabo je sindani 'di ra su ima sati ma jebaa.

Erini emviria akua, esu anzi yi mupira aviria. Fi mupira avi yi pie. Yi ni aviria sindani e'de jebaa risi ra avi te. Ca akua ra ece ima andri ni e'yo i 'ye pi 'di ra. "Saa vile risi i'ba sindani karatasi ma rua." Andri ri eri zi dika dika kini, "Fi mi ma dria ra ya?" Azabo ri omvi, "Ee, mama, fi ma dria ra."

Drusi 'dini, mva 'di 'du emvu muzu yi ebe zu. Ka mu yi okoo emvu ma alea 'bo, ra emvu ma rua karatasi si ka ji yi akua ndo. Karatasi 'da nga odu ra emvu e'de vaa andi nyirinyiri. Mva 'di aza de ima ru ni yo ri le adusikuni te yi aluni ji akua ku ye. Ca akua ra ece ima andrini e'yo i 'ye piri. "Andri nga 'yo eri ni awoko si kini, "Ma mvi la, sawa vile risi i 'ba emvu mi ma dria.

O'du azi nduni si ati 'yo erini kini ma mu ndri yi truu ji iribia. Aza'bo kamu ndri yi otru alo tia risi 'bo, 'du ndri 'ba ima dria! Ndri nga dri ni vii ari be wa. Aza'bo nga tre kpere ati zi a'di 'ye eri ni ya ri. Aza'bo ece e'yo i 'ye pi ri ra. Ati 'yo eri ni kini, "'Ba ndri 'yi azini ose baka si." "Mi nga mi aza 'diyi ku a'du ngarii?" 'Yo ima okuni ni kini i nga eyi odro akua risi iri tro Aza'bo ka ima aza 'dayi ku ku ria. Aza'bo ma andri ovu ima ciri.

Drusi dini dika, omu azi emu 'ba'di yi vu akua. Agu 'di nga ima mvi ma ti pee cua za jezu. Agu za ozi pi ri fe za ra Aza'bo ombe za baka si e'do se jizu akua. Nzu za nde be okposi a'dusiku eri ma tipika 'yo te ma go mbele. Mi ma ega nga di za 'da ca akua 'dale ngoni yari.

Mva 'di mu kpi ima ati vu fe za dri nia. Ati ma drinza, ni ata i 'ye a'duru yari ku. Ati 'yo eri ni kini ma mu lu ima afa yi tra ma da i ima akua ri si ra. Andri kamu e'yo 'di eri 'bo, asi aku nde ku indi muzu ima mva be. Aza'bo nyo jokoni ma tile ji indi. Aza'bo 'yo ima andri ni yi nga jotile nderi ayu yima jo yisi ni sizu.

Yi e'do di yima aci muzu eri ma ati vusi re ri. Muu aci izu kpere angu ni biria te o'bii pari isu jo sizu ti. Yi nga di tu o'du ko pati sia. Yi 'ba yima jotile pati sia indi.

Yini ovuria 'bua pati sia, yi eri 'ba azi yi ma o'duko vaa. Ori nde yi onzi onzi. Ne agupi azini yi azia afa azi pie gunia si tretre. Ori nde di yi onzi, te yi mu ne ku jotile nzo e'dezu vaa kpu. Ori si agupi azia 'da mbe yi ongu dria apazu, te kuu afa te yi ma dria gunia si 'dayi 'daa.

Aza'bo pi esi ima andri be vaa gunia ale andrizu. Yi esu sende angiri ambamba, bongo pie afa azi ndu ndu 'diyi pie. Ayiko fu di yi yini afa esuzu karakara risi saaru. Aza'bo 'yo ima andri ni kini, "Agupi 'dayi oguo yi." Andri omvi kini, "'Bama 'du afa 'diyi ra 'ba ma apa denga agupi nde yi egoo ama ndazu ku." Yi apa di yima afa 'diyi pie muzu a'azu ayiko si 'dani 'dani. Oguo nde yi teni egoo dika ku ye.