Saa azini ndra alu, aku azini ndra ci. Aku `da ma alia pati efi azini aluzaru ni ndra aku dria ci. `Ba dria yi ndra mu aku `da alia `dale pati efi `da nya aku `da ma alia. Zamva azini vini ndra ndrizaru ci azini `ba dria ri eri ma ndrita, sini mvepi, azini agape rari eri ma adriza onyiru ri ma e`yo nze ni.

Erini zozu `bo risi, karile azini agupi `wara `diyi ri dria mu yi vile akua `dale lezu eri jezu. Eri ma tipika ega kini agu `bani ngazu eri fezu jezu drinia ri ni nga aa `ba ripi aku `da ma dria `da etu zu pati efi `da nyakokoru ri `I, `da ndra e`yo azi ewaru ni `yezaru.

E`yo `da ku suru `da ma alia `da wakaka. Agupi dri ekopi emupi oko ri ni ndra `ba amvu `ya `ba `diyi ma drile ru ri `i. Ndri ndra saaru, eri afa be dria azini eri mvaaru. `Ba ai eri ra dika `ba fe eri ni pati efi `da nya. Ri saa were ra `da ma vutia `du pati efi `da nya ra. `Ba pe tini te.

Agu `ba anyapa ta mbapi `diyi ma drileru ri emu namba iri si ni. Eri ndra mvaru, ndrizaru azini afa be dria. Eri ma e`yo fi zamva `da ma asia ra. `Ba ka mu eri dri pati efi `da fe `bo, `du ra nyara. `Ba pe tini ra a`disiku awini obeta agaku.

Agu emupi `da ma vutia ri ma nyaku ndra badaka. Eri ndra `ba azini afuru azini onzivu ru ni. Zamva `da zi mungu ima asia kini le ma nya pati efi `da ra `ba ma pe tini ra. `Ba ka mu eri ni pati efi `da fe nyazaru `bo, ga nyako si. Sawa ka mu aga `bo, zamva `da e`do ru ma erivu ma nya ani pati efi nderi beni. Sawa kamu ca mudri `bo, abiri nde eri kai ra `du pati efi ra nyara. `Ba dro eri ra.

Opi angu `da niri emu vini obeta `da o`bizu. Eri ndra `ba azini anyamgbolo ru, onzivu ru, afuru, deza ru azini adriza be onzi ni. `Ba aluni le ni ndra eri angu `da ma alia `daa ku. Zamva `da aa asi `baza be kini eri nga pati efi `da nya ra azini mu ra. `Ba ka mu eri ni pati efi `da fe `bo, ga nyako si. Aa etu zu, te sawa mudri drini iria leru `dia, zi 'i eco te mu azakoria ra yari. Eri ni dri edazu risi, pati efi `da ma aji arikari ru ri ngu eri ma rua azini eri ma ti eca dria ekaru! Nya de pati efi `da engazu coronia `dale`bo. `Zamva `da ma Whi `ye `bani tini pezu ra ri si.

O`du `dama vutia risi, `ba azi emu ku ye. `Da ma vutia, opi vile mvari emu. Eri ndra mvaru afa ei ni azini ndriza ru. So zamva `da ma asi ra azini zamva nderi lu eri ni ndi ndi ru kini ma nya pati efi `da ku. Pati efi ma kalafe erini fele drinia ri cani erini fe `ba azi `diyi dri ri ma tia ku. Sawa azia ni mu casi `di de opi mvi nya pati efi `da `bo, de `ba pe vini tini `bo. Awoko nya zamva ni tu azini wu `I kai.

Drusi `dini `ba azi amvu `yapi ni emu. Eri ini ndra alio ni, rua nia azo ga tretre, eri ovuru azini mvaru te `ban i eri angu `da alia saaru androndroa si. Erini emuria ni ra kini 'i lu `da ini emu oku `du. Zamva `da fe erini pati efi karakara ru azini ai eri yi nyazu ra muzu te, ga nyako si. Zamva ri di te asi suza be. Sawa ca azia, aro, mudra, nga di yi mvuza ai. Zamva `da ri kiri ega kini eri nga nyara te mbeleru saa ini ni alu ca.

Eri ma tipika ngadi yi vile zamva ri fe asi suza be agupi ovuoru yini omvele `ba amvu `yapi ri `i ri dri. Zamva `da o`bi matu `ba `bani I kuzu ja te eri ma tipika so pa oyo ndra yini soleri ma dria. Geria yini muria `ba amvu `yapi ri vile akua `dale, sa ima dri azini e`do ongo azini ngo. Ongo `di eji `ba karakara nzila dria.

`Ba `diyi ndra de opi mvi vile ati`bo `diyi. Fe agupi `da dri sende piyi ti pie coti ko dri mu ra ku zamva `da pi ati`bo opi vile `diyi pie a`dule.

Ati`bo `diyi zi zamva nderi ni bongo yini fele eridri nyoro pie `diyi osuzu. Nga di eri ji opi vile akua. `Ba omve eri ma tipika yi ra azini `ba otu omu opi vile mva ri pi ecizu zamva ndrizaru ri be aje alia.