Go ne go na le segokgo sengwe se bidiwa Anansi. Ka letsatsi lengwe Anansi o ne a ya go kotula dipotata kwa tshimong ya gagwe. Di ne di botswile sentle ebile di le monate. O ne a di besa mo molelong ka tlhoafalo mme a nna fa fatshe go di ja.

Erile fela a re o a ja, a utlwa go kokotiwa mo mojakong wa gagwe. "Ao tlhe!" E ka be e le mang oo?" fela o ne a ya go bula mojako. Erile fa a bula a kgatlhana le Khudu, a lebega a lapile. "Ke kopa go tsena Anansi. Ke tsamaile nako e telele gompieno, ke lapile thata ebile ke tshwere ke tlala", ga rialo Khudu. Anansi o ne a tla dira eng fa e se fela go bulela Khudu?"

Mme fela Anansi o ne a le megabaru go kgaoganya dipotata tsa gagwe tse di monate le Khudu. O ne a tla ka leano le le maswe. Erile fa khudu a re o dula mo fatshe go ja dipotata, Anansi o ne a mo goelela a re, "matsogo a gago a leswe Khudu! O ka se je ka matsogo a ao! Tsamaya o ye go a tlhapa." Tota matsogo a ga Khudu a ne a le leswe ka gonne o ne a tsamaya ka one letsatsi lotlhe. Khudu o ne a tswela kwa ntle go ya go tlhapa matsogo kwa nokeng, a ngongoela ka iketlo go boela kwa tafoleng ya dijo.

Ka nako eo, Anansi ene o ne a tsweletse go ja dipotata. Erile fa Khudu a boela kwa tafoleng, a lemoga gore ga go a sala le fa e le potato e le nngwe. Khudu o ile a lebelela Anansi ka pelo e e botlhoko mme a re, "ke lebogela taletso ya dijo. Fa ka letsatsi lengwe o le gaufi le ntlo ya me, o tsene le wena o tle go ja le nna." Khudu o ne a tswa a itsamaela ka pelo e e botlhoko.

Fa nako e ntse e tsamaya, Anansi a nagana ka taletso ya ga khudu. Ka letsatsi lengwe a tswa a ya kwa ga Khudu. Anansi o ile a goroga kwa ga khudu fela fa Khudu a ipaakanyetsa go ja. Khudu o ne a ikadile mo letsatsi fela jaaka e le tlwaelo ya bokhudu. Erile fa Khudu a bona Anansi a re, dumela Anansi, a o tlile go ja le nna?" "Ee, seo se ka itumedisa", ga rialo Anansi. Ka nako eo Anansi o ne a tshwere ke tlala thata."

Khudu o ne a itatlhela kwa boteng jwa noka go baakanya tafole ya dijo. Anansi o ne a mo emetse mo thoko ga noka. Morago ga sebakanyana Khudu a thumela kwa ntle mme a re, "Heela Anansi! Tsotlhe di siame jaanong. Tla o tle go ja le nna." Khudu o ile a itatlhela gape mo metsing mme a a tshimolola go ja matlhare a matala a a rokotsang mathe.

Anansi o ile a leka go itatlhela kwa boteng jwa noka. Mme ka gonne segokgo ga se kgone go thuma, Anansi o ne a sa kgone go fitlhelela kwa boteng jwa noka. O ne a felela fela mo godimo ga metsi gangwe le gape. O ne a leka go itatlhela mo metsing, a leka go ya kwa boteng jwa metsi, mme go se sepe se se thusang. O ne a sa kgone gotlhelele go fitlhela boteng jwa metsi.

Kwa bofelong Anansi a nna le kakanyo. O ne a tsenya ditena mo dikgetsing tsa jase ya gagwe mme a nna boima gore a be a fitlhe kwa boteng jwa noka. A botlhale jo bo kana! Jaanong o ne a kgona go bona tafole ya ga Khudu, e tletse ka matlhare a matala a a rokotsang mathe le dijo tse dingwe tse di monate. Anansi o ne a tswa pelo.

Erile fela fa Anansi a leka go fitlhelela dijo tseo, Khudu a mo kgalema: "Anansi, ga ke dumele gore o batla go ja dijo o apere jase? Ga ise ka mokgwa o re dirang dilo ka teng mo ga ka." Kwa ntle ga go nagana Anansi a re, "O bua nnete Khudu! Ke ne ke nagana eng?" mme a apola jase ya gagwe.

Mme kwa ntle ga ditena tsa gagwe, Anansi o ne a le bofefo mme a boela kwa godimo ga metsi, mme a wela kwa ntle ga metsi. Ka kutlobotlhoko Anansi o ile a tsenya tlhogo ya gagwe mo metsing mme a lebelela Khudu a ja dijo tsa gagwe tse di monate tsotlhe.