O'du alu, ebio mu maku iji ivile amvua. Eyi maku onyi be aluza 'dii. O'bi eyi e'yere aci si. 'Da ma vutia ri vaa maku nde 'dii nyazu.

Ebio ni le maku oko ri su itia ria, ari agu azi kaati ga. "Kirikiri!" Anansi ora asi si. "Kaati gapi 'da ri vini a'di'I yaani?" Nzi kaati. Isu 'da Okukua 'i. E'da andeza ru. Okukua nga 'yo, "Ma agii Anansi, iko ma aza, ma efi mivile joa. Ma aci andru 'dole ambamba. Abirini vini ma fufu" Ebio ni i a'du 'ye 'i ka yaari ku, pe lu Okukua ni efizu joa!

Endra si Ebio le ima maku aluza 'dii nya 'ba azi be ku, ka tro ovu amu ni. Ebio eji olokiriOkukua ni mu ri mesa tia lezu maku nyazu, Ebio za eri ma dria, "Mi drii ondi ru. Mi eco afa nya dri ondi be ku. Mima mu eyi ojii." Okukua ma dri ondi ru ada ada eri ni acizu etu zuri si. Okukua ga e'yere yia ima dri ojii, dika ga e'yere vile lezu muzu maku nyazu.

Eri ni mu 'I dri ojiiria, Ebio e'do maku 'diyi oki mbele mbele. Okukua ni mu eca 'bo esu maku oko ra. Okukua ne Ebio 'dini, 'yo eri ni: "Awa'difo mini ma omvezu nyaka nyazu mivile akuari si. I ka ali mavu 'dasi, mima emu mavile akua. Ale mini onyi 'ye kile mini 'ye maniri le." Okukua e'do gaa e'yere 'I vile akua.

O'du alii were, Ebio e'do e'yo ega nyaka Okukua ni 'yori ma dria. O'du alu kodri mu Okukua vile akua. Ebio ca Okukua vile akua saa nyaka vileria, etu ni di 'desi yi dria. Esu Okukua la'i onidria etu yu oku okuku eyini 'yeri le. Okukua kami Ebio ni nee 'bo, 'yo: "Ma agii Ebio! Mi eca manee mani mini onyi ndra mini 'ye maniri ofezu 'di 'I ya?" Ebio nga 'yo: "E, 'da muke, awa'difo mini." Abiri e'doo eri fu tu.

Okukua fi yi alia mesa nyakani ri ede, dika afa woro etuzu. Ebio te Okukua ni onidria yitia. Saa were vutia Okukua efu yi aliari si. Nga 'yo: "Oh Ebio Ma etu nyaka 'bo. Ama ma mu nyaka nya." Okukua fi yi alia dika. E'do nyaka erini etu ibibi si ri nya.

Ebio o'bi fi yi alia, te eri ni ovuzu ebio nirisi, econi fi yi alia ali ku. Yi ri eri amii vile vile yi dria. O'bi mvumvu, o'bi gaaga, woro ko eri ma aza ku.

Ondoa etu Ebio ma dria. O'ba oni kara ivile koti ma jibaa. 'Da ma vutia eca nziza ru ecozu fizu yi alia ra. Ega kini 'ima ondoa tu! Ne mesa Okukuani o'ba ri, eribi ala 'dii nyaka azi aluza 'dii be. Eri ma tusu e'do ra elifiri si.

Ebio ni le e'do nyaka aluza 'dii nyaria, Okukua atri eri: "Ebio, mi econi nyaka nya koti be ruatia ku. 'Di ovuni adriza mavile joa 'doleri ku." Egataa koko, Ebio nga 'yo: "Oh, ada Okukua! Ma egani te 'da ku?" Nga koti truu.

Te oni eri feepi ecaapi nzizaru ri koko, Ebio e'do anga yidria vile kpere yi aliari si amve. Ebio su ima dri yi alia candi candi ru, ne Okukua ni nyaka aluza 'dii nyaria.