Apei kwaari abu Anansi-asimokok, tolem ng'abiyasia alo mana keng. Ajokak ng'abiyasia ng'una tobobok. Abu ng'esi kimak ng'abiyasia nakim niti echoikinit lokojokon dio akiboikin kwap.

Napei ebala Anansi atokonu abiyas kona! Abu ng'esi kiira ekidor idong'odong'okinio. "Woe! Mam!" Tatamak Anansi, "Epedori itwaan een araun ng'ae?" Neni dae abu ng'esi tangaa ekidor. Awei Akumaach na aburunit lokojokon alokidor. Tama Akumaach, "Anansi, wae! Tang'aunae kare!alosit ayong erot kooyen akwaar naga kaburunit." Aloger kangolo, nyo iche adikino Anansi esubi pe aria ang'aun ng'esi tooma.

Arono amonis ka Anansi noi. Pe apedori ng'esi akimor ng'abiyasia ka iche tani epeyonon keng. Abu ng'esi kitamu ng'ataos. Napei cha iboikin Akumaach ebala atolemu abiyas adio, kirema Anansi tama, "Eborok ng'akan kon! Ng'ipedori iyong akimuj eborok ng'akan, kape kilata. Aborok dir ng'akan Akumaach kotere alosio ng'esi kechi apaaran daang." Kong'ina bocha abu Akumaach tolia Nang'olol akilatar ng'akan dio tobongu tani ni emujere.

Kisiak Anansi akileleb ng'abiyasia lokitiny daang imuji. Ani na adolunio Akumaach abu ng'esi toriam ng'abiyasia kedaun. Tokienyik Akumaach Anansi dio alimokin tama, "Alakara kotere akipeyoun nakimuj nakeebong, monan kiyeyei diye awi kang kitoru katobuak ayong dae iyong ajokis kon." Dio Akumaach kisiak aliar wadio nawi keng.

Adaunet ng'ache-rwa, abu Anansi kisiak akitam noi kidiama akimuj na atabong nakolong epeyounit ngesi Akumaach. Akwaar apei kilaa ng'esi nawi Akumaach. Abu Anansi todol nawi Akumaach ebong ng'asaa na akimuj adoyoret akolong. Ayei Akumaach kidiama Ataaba emae akolong loger lopaleng kech. Napei eng'olikinia Akumaach Anansi king'it tama, "Nyanu ng'ache Anansi, ibunit iyong napeyo naka-ebong-a?" Tatachu Anansi tama, "Ee itemokino." Anyamit ng'esi akoro lokojokon.

Toloma Akumaach nakipi ang'olol asubakin akimuj dio kidong Anansi nataaba lokwaas ang'olol idarounit. Wadio, kilulumao Akumaach tobongu tama, "Anansi! Bua emuja akono akimuj." Kingarenik Akumaach tooma nakipi kisiak akimuj ng'akuui nakabobok edorikinit ng'esi erai akimuj ka ebong.

Kining Anansi alomar nakipi ang'olol dio kipiyo kotere aria ng'esi Asomokok meere Akumaach. Kidong ng'esi ilebolebo kidiama ng'akipi. Kining tani aporokin tooma, ta akilulumare nakaneni nyepedoro ng'esi aking'arakin. Amam ng'esi jik erot lo enang'ia ni ayei akimuj.

Esal, abu Anansi toriam atamet, kiwaak ng'esi ng'amoru nakaalak tooma lopukoi ekoti, topotior dio taloma jik tanang kop ng'akipi ang'olol ni ayei akimuj. Awos ng'esi kwai! Abu ng'esi toriamu Akumaach imuji, ileleba ng'akui naalibak ka ng'amuja nache nakaabok. Apotu ng'akajaala kilelebun nakituk a Anansi.

Napei cha ebala Anansi atolemu akimuj kona! Kiratak Akumaach ng'esi. "Anansi, nyipedori iyong akimuj inapit ekoti, nabo nyesubio ng'akiro kong'ina anawi kang." Tolimu Anansi pe itamit tama. "Dir iteni ng'akiro ng'una, nyo mono tokona etami ayong?" Napei kona tobuto Anansi ekot keng.

Nakaneni emam ng'amor alopukoi ekot keng abu Anansi kilebulebun kidiama ng'akipi ang'olol dio topudo jik king'a. Abu ng'esi kiwaak akou keng nakipi a ang'oit ka akisemere Akumaach imuji akimuj nakabobon daang bon.