Lulala ŋaliŋo enjala pereketya mu hyalo. Ŋabula owaaliho n'ehyohulya ohutusaho Nahinywamalwa. Hiisi mugamba abanahinywamalwa baguluhanga olugendo olwene oluleeŋi ohwola eyaali omusaala ogwaliho amahuyu amalabire ni guli ŋagaati w'olwabi olwene olugalamu. Ni bahenanga ohunoga amahuyu nga baagamayo ni bagegire agaawe n'agabalebe baawe. Amahuyu ago galeeteranga Haŋambi oyu balanga namumbirya ohwegomba era gaŋeega hu ngeri eyi aŋanga ohusuna ebiryo ebyo.

Gayiiyaŋo amagesi agohuta hu wihaliro buwe obulimbo ng'ahena abugula olujo atiina ewa banahinywamalwa abaloma ati, "Mupeho omuliro." Ni baali ko ni bamubugulira eryanda ly'omuliro, namumbirya gehala hu ehuyu eryali ni lihiramo obubba nga limweŋamba hu wihaliro. Ni bamuŋa eryanda ly'omuliro nga geyaasa ahena geyuna engo ohulya ehuyu eri asunire.

Aye ehy'ahabi ehiriiwa ehirala hyali sihimwiguta. Kale gagamayo omulundi ogwohubiri era gahola nj'ehyene. Ni gagagmayo omulundi ogwohudaatu abanahinywamalwa batagiha ohumwebusabusamo era nga bamubuusa lwahiina gaali ogobojolagobojola eyi bali ati genda omuliro. Nga namumbirya agobolamo ati, "Hiisi olu pwa eno noola amanda ni gasimire." Nga abanahinywamalwa bamuloma baati, "Odulinga! Wenda biryo byefe!" Nga Haŋambi abagobolamo ati, "Kadi, ehyo sihituufu", ng'ahena atagiha ohulira. Nga abanahinywamalwa bamuŋambirwa ehisa.

Ni wahya, hiisi nahinywamalwa gaŋa Haŋambi olwoya lulala. Nga wangewe agululuha ni nabo ohwola hu musaala nago ogwali ŋagati w'olwabi olugalamu. Haŋambi ni galengera amahuyu amanyulu, ng'agegwanisa gosigosi. Hiisi olu nahinywamalwa gagesyangaho ohunogaho, ng'amuhayula ati, "Eryo lyange, ndiise owehereeye ohulibona!" Ng'olwo alinoga alita mu hisaŋu hihye. Hu komerero gaali n'amahuyu gosigosi abanahinywamalwa ndibafunaho nayire.

Nga abanahinywamalwa bamuleha eyo yeka bagama. Ehireema ni hyatagiiha ohuŋamba ng'aloma ati, "Nimba ni tenda husigala mu gusaala guno seŋeene, ndi n'ohuguluha hya banahinywamalwa." Ng'aŋo gesinga atuuma mu bbanga atagihe ohuguluha! Coka nga BBwa-a-a-a! Gedimbuula mu lwabi mu gagoona.

Ng'aŋo Haŋambi aŋulira erala hu magoona ni liroma liiti, "Hiina ehihuuli nahyo ŋaano?" "Ahanohi ahanoli ohohugabbula oti, nyamu." Nga namumbirya gerira n'aloma ati, "Oo, munjede! Koni simumanyire? Ndi mulala hu balebe benywe abaali ni bagotire. Ninywe abalebe bange abadaayi abanahagananaho ni nabo" Gabbologa bugaali weene amagoona gamusasira.

Aye egoona ehulu nga liroma liiti, "Hunahahase huuti oli mulala hu efe singa onalye hy'efe era wanyumirwa supu womu madosi. Ng'amagoona gamuŋa etamu erimo amaaji amacaafu agafaana hy'eroba anywe. Nga Haŋambi aloma ati, "Supu ono afanira erala hy'oyu nguhwa yange ganyiiyanga!" Coka ng'ayaba eroŋo mwiroba n'ohugulu huhwe ohwenyuma era ng'aŋundula eŋundu mu tamu n'ohugulu huhwe ohw'emutwe. Nga geholesa oti hani anywa supu nago n'eno amaaji agabamuŋaaye pogasulula ni gatiina mwiroŋo eri ayabire."

Olufanyuma amaaji ni gaŋwamo nga namumbirya aloma ati, "A! Ohuŋooma! Ng'amagoona gamuloma gaati, "Ŋahani hufanisye huuti dala oli mulala huufe" Nga gahena gafugiirira Haŋambi ohuŋenyuha mwiroŋo lyago owiire owo. "Ero ni ryali ni linatere ohubaŋira nga namumbirya aloma amagoona ati, "Ejo mu mugamba nahabaŋayire ebipambaho."

Ni wahya ni waali ni butanuuha, Haŋambi gasisimusa gulala hu gagoona gaguloma ati, "Nenda hutiina ndete omuhasi wange n'abaana ohuŋwa engereha bahanjeeda ohubaŋayira ebipambaho. Kale nyede bunyambuse abahyo ni bahiiri husisimuha."

Ogugoona sigwasangaala olw'ohugusisimusa mu mawiwi. Coka nga namumbirya agwegayirira ati, "Njede, ewe osanya mangu ohusinga. Ng'egoona lyehirisa Haŋambi alyebehesa hu mugongo limwambusa paka hwigobo. Ni gatumaho ng'aloma egoona ati, "Ngoboola mangu! Otaŋwaŋo" Ng'ahena gesweha mwisugu."

Neyi buli eno egoona lihirindiriiye Haŋambi, n'ogusuulu gwalyo oguleeŋi ko n'agaboni agembira ni bifundulaye hu mugulu w'olwabi.