Pale azini ndra alu, liki amboru `de angua ni. `Ba dria vu afa nyazaru yo pe lu gaa gaa yi. O`biti alu alu vu si gaa gaa ri saa re mu pari azini elio pati efi be niza ru ni ovuzu ci ni ma alia yi ara azi walaru ni ma agadua `daa. Yi di vini dri eda vile elio pati efi nizaru be yi dri azini yi ma ori`ba yi dri nyazaru. Elio pati efi karakara ru ri e`do fee ebio ma tusu ni razu elifiri si. Eco yi ma azi esu ima ngulupi ni ngoniru ya ri ma e`yo eza drini ra?

Egata azini etu eri ma dria. Tri ima eti anyu ma esese tika tika ri si. `Du ajirikolia were ni ima dria ra ko dri mu gaa gaa yi vu. "Kate eco ra si emi eco ma aza ko ra ya?" zi yi. "Ale te ma ni aci oluku muzu aci ma vile ri eduzu dika." Yi ni aci olu e`duria engazu acia risi, Ebio ri e`yere elio pati efi ambo ndeni ri ma dria, ma ebi ani I ima etia beni. Fe awa`difo gaa gaa yini ra ari di ru muzu akua elio pati efi nderi nyazu.

Te elio pati efi alu ri cani erini ku. Da dri vile pale irizurisi, `ye alu ri le. Ka mu dri da pale nazu risi `bo, gaa gaa yi e`do e`yo ega ndu. "Mi ri dri eda ama vu dika dika emu aci olu `du a`di e`yo si?" zi eri. Ebio omvi, "aka o`du dria ca akua `bo, aci mani `du ri ni dra te." "Mi `di inzo li" Gaa gaa `yo eri ni. "Ile lu `di mini ama vile nyaka ni!" "Ovu ni `dale ku" Ebio omvi ra coti e`do owu. Candi amboru bi Gaa gaa yi eri si tu.

O`biti drio drio drusi `dini, gaa gaa alu alu so eri dri `biko. Saa yi be elio pati yi ara walaru ri ma agadua `dale. Ka mu elio pati efi ndriza ri ne `bo, Ebio le yi etra woro I dri. Saa dria gaagaa yini lezu elio pati efi eti zu ria, erieri tre "`da mani! Ane te eri oko!" Eri coti elio pati efi eti suzu 'i vile jurua ma alia. Saa azi alia, Ebio etra elio pati efi woro 'i dri ra ku gaa gaa yi pirini.

"Ani ki di curu`do mi lokiri ru ri `bo," gaa gaa de pi ndeni ri nga `yo. Gaa gaa onze yi ma`biko yi ebio ma rua risi woro ra saa te. Angu ni leria biria leru `dia, awi di lu ku nyai a`dule. "Aka le oa pati `di ma sia `dia ewule ewule ku, le ma ma mbu lu oli alia kile gaa gaa yi le." Ani se ava ezu, mbu, azinicalu! E`de yi alia cu eyio yi ma agadua.

Afa ama vu `dia ciri a`du ni?" eyio azini zi o`duko horohoro si. Afa azini wereru nyazaru, nyam nyam" "Ma ye kirikiri inya ku," Ebio `yo. Coti e`do owu. "Ini ni ma emi azi ni ri ku?" ma avi ndra ewu imi a`bipi yi vile `da sidika `ba azini di ndra ma esu pi ni yo. Emi ma vile ori`ba oko mani dri fuzu yi be `diyi!" wu i kai ra ani fe eyio yi ma asia candi fi tu."

Eyio amba ri kini "ama nga ni mi ama azi ni ri ika odri ma yi le avasi azini mvu amani mvu ri le ra ria." Fe eri dri yi ondiru emvu alia. "`Do si di `I be be ma idi ni oku ede ri le!" Ebio `yo. Te va `bile azini nyakua ima pa vile ri si ra, va vini `bile azini ri emvu ma rua ima pa drile ri si. `Ba ti kile eri odri yi mvu ri le de ri fe yini razu `bile eri ma pa vutia leru ri ma alia. Eri ni emvua feria vile, `yo "alu fudri ci!"

"Anidi ra mi di curu`do ama azini" eyio azini nga `yo. Ani, ku ki ebio ni o`du kozu yi be ini `da si. "Ma nga emini e`yo nze idri ma vile ri ma dria drusi " Ebio `yo yini yi leria o`du koria.

O`biti drio drio drusi `dini, denga angu e`doni nga mve ku, Ebio enga eyio yi ma azi aluni. "Ale mu ma vile okuri pi yi eji anzi be engazu yi `di ma aa`dasi, yi di nga ani ma aza ko a`diko mani le olu ri olu zu `beni. Mi eco ma aza ko de nga eyio azi `diyi enga ku ra?"

Awoko nya eyio `da `bani eri enga o`biti drio drio risi tu. "Kiri kiri eko mani ma aza! Mi yi saa mbelembele aga ma ra"Ebio `yo. Eyio `da ai ra ngadi Ebio ni `du nguku si kpere yi ma tia aa `dasi. Esi nguku nia risi mbele ra kini"imu ku ma lu dri eda mbele. Imu nga ku fo!" Ebio `yo, erini nzuria ase talasi `dale.

Amani amani ni ri si, eyio ni nga kiri ebio ni te ria ima andreti izu azini mile nyoro le `da be kiri yi dria amve.   Ebio pi, gaa gaa pie azini eyio pie.