Mundalo tsiakhale, yaliwo omundu walangwa mbu Pepe. Yali yamenya mushikwenyi shia Bulala.

Pepe yaliyamenya nende imbwa yiye mukhakorokhe.

Inyanga ndala Pepe yalwala. Shiyali nende yesiyesi owakhamukhonyere tawe.

Shingalwa yasosa, yaula okhuteshia omukhasi owali niyamenya ahembihawo.

Pepe yalanga abetsa nende abaluyiabe okhwitsa mushiserero shishie.

Yasangala muno napara mbu anyolere owokhumukhonya.

Omweya yaheresibwa efimwero fiobule, amayambo, amaremwa, tsinjuku nende efihanwa findi.

Inyuma womwikhoyo kweshiserero, abacheni babwao.

Pepe yali niyerecheshere okhuchaka obulamu obuyakha halala nende omukhasiwe neimbwaye.

Inyanga yalondakhwo, Pepe yakamira omukhaye we amaremwa amengu, nabutswa yaloba okhukalia.

Nabutswa Pepe shinga yatsia okhuyima, omukhasi oyo yalia amaremwa kosi.

Inyuma wokhukalukha mukhuyima, Pepe yahulila inzala. Yenya okhulia amaremwa kalia amengu.

Omukhasiwe yamubolela mbu imbwa ikalire kosi.

Inyanga yalondakho Pepe yatsia mundalo.

Ngalwa yakalukha, yanyola omukhasi nalire inyama yosi. Shiyakabilakho imbwa tawe.

Nyanga lundu, Pepe yatsia okhuchendera omwitsawe. Ngalwa yakalukha, omukhasiwe yali nalire tsinjuku tsiosi. Eshimwero shiali eshikhaya.

Pepe yamusinyishira muno omukhasiwe.

Pepe yanyola mbu omukhasi oyo yali nobutinyu.
Nalola mbu amureche.

Yatsukha amabere munyungu yobwisiria nayira mulwalo. Narula natsia okhuyima.

Omukhasi oyo yayilola inyungu eyo niitsule amabere. Nayibukula nayira khumunwa.
Nanywa amabere ako kosi ne imbwa niyimuhenga.

Inyungu yamuhanda khumunwa. Yatema okhuyiyinia nikalanyalikha tawe. Yakhupa obuyoka narumachira hekulu nende hasi.

Inyungu yahanda sa khumunwa. Imbwa yelolerera kosi.

Imbwa yerukha okhumukhaba Pepe. Yasema, niyisema nirumachira hekulu nende hasi.

Pepe yamanya mbu likhuwa libi likholeshe ingo.

Berukha halala okhutsia ingo. Pepe yahuka okhunyola omukhasi nende inyungu khumunwa.

Namurangala nauka.

Pepe yamuhabasia omukhasiwe khundama ne inyungu niyilakakha hasi.

Omukhasi oyo yatirwa netsisoni nalola mbu akalushire abebusibe.