Ibio pi ndra etoo be agiyi ni. Yi ndra aa suru azini asianzuru dini le ni ma alea oni ma talaa. Etoo ma amvu ndra ambu pati efi nyaza ri pi eribi pie alenia indi. Etoo ni tro o'bi zu afa ibe indi di yi awazu anyapa azini diyi pie ra ti, ibio ri ovu eri 'be a'ya si.

'Dini, Ibio nga di otuta azini otu lezu etoo ma amvu 'duzu. 'Da ma vutia, etoo nga di eca alioru azini aku koko ru. Ibio nga di eca etoo ma amvu ma e'i ru, eri ma eribi pie azini pati efi pie dria.

Ibio nga di mu cua ima pati efi pi ozizu eribi pie. Nga robia isu ogeyia si tre. Robia nde ma esele azi si je kaka aku i vile ri ni, nga eri 'ba robia dria ogeyia ma alea.

Ibio ko di dri muzu akua ogeyia be esaza ru i ma dria, ongo ngoza pie ayiko ayiko. Ri e'yo ega afa ndu ndu i ni lele oje robia i vile ri si ri ma dria.

Eri ni mu ria geria, yimayi nga e'do oyi. Sawa were vutia, yimayi nde oja i ozoo amboru ni ru. Ibio ku i ma ogeyia geritia apa pati etia. Ri i ma ogeyia nde ne ci ci 'ba azini ma 'du ogeyia nde ku beni.

Ozoo e'do 'di dika dika, Ibio ma rua eca woro ebi azini egbe edo eri ya. Nga di nzu fi bile azini ma alea. "Ma nga aa 'bile 'di ma alea kpere ozoo ni i de," Ibio nga e'yo nze a'dule a'dule. "E'yo muke ri, a 'ba ma ma sende ma dria kaka ci."

Sawa were vutia, roko ri onga inyia 'dasi, nga ogeyia geri tia ri ene. Ne ogeyia nde ma alea send pi kaka be. A'bu ogeyia nde ma ti i ma opile'bi yi si ci erini ozo teria atiria.

Ibio ne roko ni riria i ma ogeyia tia. Nga 'yo Roko ni kini, "Ee, ma agiyi awadifo mini ma ogeyia ma ta mbaleri si 'do." Roko nga omvi kini, "ee, ngaka, ma eri we 'di mi piri?" "Mi ma ogeyi ni 'di ni ya? Ogeyi 'diri mani! Ma esu eri nyai geriko tia dia." Ibio ega nga 'da enzoni. Nga 'yo Roko ni, "Eri mani," alu nga mini 'di.

Ibio mu awoko pie owoko pie roko ni tozu opi ma tia. Roko 'yo opi ma tia kini "'Ba azini eco i ma ogeyia ga pi sende azini kaka si tre ni ku geritia ageyi te kokoru ngoni ru ya?" "Te ari 'de ma ma ogeyia ne ci ci," Sende 'di pi kaka 'di be mani!" Ibio nga omvi. "Mini efuria kani engazu ngole yani mi esu ce de ma a'bu ma ogeyia ma ti ma ma opile bi si ci te enga yo kini ogeyia nde mini?" Roko zi eri."

Opi pi ka mu eyo 'ba iri 'diyi ni 'yole ri eri kilili 'bo, yi nga Ibio pi ma ti pe roko be re. Yi nga di eyo nde ma ale nya sawa ezu vutia. Asizu yi li di kesi ra.

Opi omve di Ibio pi Roko be i vu vile. 'Yo di yi ni kini, "Ama a'i e'yo Roko ni yole ri i." "Ovuni oguo ni ku. Kani, i le afa azini ovu pi mini ku ni iri mini ru." Ibio ega nga 'i eri enzo ni. Nga i mbe awu dria.

E'yo kesi ni Ibio ni ndezu ri ere mbeleru wakaka. Ibio ni mvi ria akua, nga 'di etoo ma acece eri erini guria e'yo i ye pi Ibio ma rua ri si. Etoa nga 'di oku mu ima amvu 'da ma alea pati efi yi sa eribi yi pie dika. Te Ibio eca di alioru nyanya, ezakiza ru azini agiyi koko ru.