Tsinyanga tsindi khale, abandu nibashibulao, Nasaye yalinga asi okhulola eshialo shia yali niyalonga. Yapara, "Ekhoyile okhuba nende omulindi wefilonje fianje."

Italanyi niilokha, "Nesie nabongo womumutsuru. Enyala okhulinda eshialo shino."

Inzofu nayo niifureresia ekulu, "Omwami wanje, wanonga okundu okukhongo kwa amani. Mubwatoto ekhoyere okhunyoola emilimo echo."

Okunyeni okukhongo kwo mumatsi kwalinga ekulu nikutubula nikuboola kuri, "Abo bamanya okhusoka nende okhulinda tsinyeni, efikulu fiomumatsi, efikulu nende emimela chia asi wa matsi, nende efikhumila fie tsisolo tsinditi tsiomumatsi? Enyala okhulinda efira makoli; khandi enyala okhwemia omurwe kwanje ekulu wa matsi ndalola eshitsilililanga khulukongo. Endi okundu okukhoongo, abulao ounyala okhukhola eshindu shiaukhane nende akawenya."

Okunyeni kundi okukhongo kwa meno amamemu, nako nikupara mbu ameno kako amamemu ka kuli nako, niko akali nikenyekha khumilimo echo.

Indutsu niitsekha. "Tsisolo tsino tsinyala busa okhulinda efili khulukongo fionyone. Ne eminyeni nacho chinyala busa okhulola tsisolo tsiomumatsi tsionyone. Ne esie emburukhanga, endolanga mwikulu, khulukongo, nende mumatsi. Nesie sienyene ouyerere okhuba omulindi we shialo shiosi."

"Ndalalonga OMUNDU." Tsisolo tsiosi tsiauka, nishindu shina shino eshilangwa mbu 'OMUNDU'. Neshia fwani shi, neshiamoya, nomba obwoya, nomba amasale? Alerukhanga nga italanyi? Asoche nga inyeni? Apurushe ekulu nga indutsu?

Eliuba liali nilikwire, nishili eshiro bulano. Nasaye yeboyela eshilima shielikulu, niyefwala mumoni okhung'enang'ena khwe tsing'ining'ini nende amalesi amamali nako nikaba liswi. Nara efipande fio omwesi khumatere nende okhwakha khwe tsing'ining'ini tsiaale khu meno. Kario omusatsa wa mbeli nende omukhasi balongwa, nende eshikhoba eshitorotoro eshimali nga eshiro.

Bwangu bwangu eshilo nishikhamulukha nimuba mumabwibwi. Nasaye niyefunikha mubulafu bwo mumabwibwi, nabukula ifwani ye likuku khulwe tsimoni, olukusikusi lwe liuba nalulukha liswi, ne imberi we omusatsa niyeema nende omukhasi, be shikhoba eshilafu, tsimoni tsielikulu nende liswi liolukusi.

Bulano mumabwibwi nimwikhola mushiteere. Eliuba liali niliakha po, ne eshiinikha eshimali shieshiteere nakhola omusatsa nende omukhasi be eshikhoba eshiengu, liswi limali nende tsimoni tsiokhwishikha kho tsinyale okhulola eliuba.

Bulano yali ingolobe, eshialo shiali nishikhwesa tsing'ining'ini nitsiakhachaka okhurula. Nasaye yalinga hasi ne nalola obulayi bwe shialo eshilayi shiolukusi nende ifwani indayi ye liseero lie inengesi. Ifwani ye shilima yali liswi ne niyekhonyela okhumwekhamwekha khwe tsing'ining'ini nga tsimoni. Imbeli we yeema omundu musatsa nende omukhasi be eshikhoba shie inengesi yeliuba nilikwa, liswi limali nende tsimoni.

Tsisolo tsiosi tsialinga nitsiwuka okhulola eshindu shiali nishiemele, efilenje fibili fionyone, eshiekenye obulali nende obwoya, amoya nomba kata amakamba. Italanyi yalinjila asi weliulu liayo lieshiami ne niyilokha, "Enyala okhubaburira busa, khandi khumatere komukhono kwanje, enyala okhubeera. Endesherwe khukhuboola endio."

Ipunda niyiyinia liparo liayo, "Obware obumali nende obulafu bwakhakasiyekho ifwana yabo." Ingwe nayo niyiboola iri, "Efironyelesi fitiitikho." Inzofu nayo niyifurerera yiri, "LIKOSHEKOSHE liakhabeere ifwani indayi."

Okunyeni okukhoongo kwalinga ameno kabo nikumwenya nikwechesia akayo amamemu. "Ah! Babula efibambo. Nabasoche barie ni batsia okhuba abokhukhulinda?" Ha! Ha! Ha! Tsinyeni tsikhongo nende tsinditi nitsitsekha. Olwa tsieinikha mulusuba lwamatsi, nitsitubuula inyuma omukhweso kweikhwenu.

Nasaye yamwenyakho busa kaala obulasinyikha ta. "Olola, okhumenya, omusaatsa wuno noulalinda tsisolo tsino, efiira- makoli nende efiamenyamo, emimera, okhurula khu orutiiti okhula khu mikhoongo chiacho. Inyanga yalichaka okhunyasia eshialo khulwa obulung'alung'anu bwe, omwene alinyasibwa." Tsisolo, tsinyeni nende amayoni, fiosi fienamia emirwe chafio ne nifisubilila mbu filalindwa obulayi. Kho khukhoyele, ewe nende esie, Okhulinda eshialo eshilayi shino.