Kolong a ang'oroto, amam ng'itung'a anakwap, eyokii akuj akwapit naajokon na asubi ng'esi. Kitamak ng'esi asubakin itwaan ni epedori akiyok ng'iboro lusubuna keng.

Kirurumak Eng'atuny tama, "Ayong aria ekapolon ang'amon, nabo dae apedori tani apolokin akwap daang."

Tobelak Etom lokojokon tama, "Akuj kang, kisubuni iyong ayong apolot noi, kiinak ng'ikilinga, dir etemokino ayong lotich ng'olo."

Tokienyia Etiangit lo apolon anam kidiama, toruwo ng'akipi tama, "Eyenete kechi akilulumare topedoreta akiyok Ng'ikolia, Ngamoru na anam ka ngabunge angitiang aluchik alu eya nanam a? Apedori ayong apolokin ng'anamia; ewaakini ayong akou kang kidiama ng'akipi eng'olikinia ibore ni esuba anakwap. Apolot ayong noi, emam tani ipei epegi na achamit ayong."

Kitamak Ekolia lo apolon dae tama kori itemokino ng'ikel lukeng luitayek lotich ng'olo.

Tokieni Egole, "Epedorete ng'itieng akiyok luche lu anga'lup, nabo epedori Ekolia lo apolon akiyok luche lu eya nakipi. Ayong apedori akipor etee kidiama ng'alup ka ng'akipi. Ayong etemokino araun Ekeyokon akwapit."

Topupok akuj emisikinit ngakiro na eyanete ng'itieng, ng'ikolea ka ng'ikieny. Tolim akuj tama, "Asubuni ayong ITWAAN." Tatalasi ng'akiro nugu ng'itieng. Nyo ibore en anyaritae ITWAAN, Iyesi ai, Eyakar ng'akopiri-a, kori ngajul, kori ng'ikabebekwa? Epedori akiker kwa Engatuny a? Ilulumae kwa Ekolia a? Eporori kidiama kwa Egole a?

Adooyoret akolong tolomu aribu. Abu Akuj kimuki a aribu, kiwaak ng'ikatwany ang'akanyer nakonyen ka ng'idowon lukirionok lotim. Kiwaak atubunet e elap lomager ka akichaa ang'ikanyer lokel keng. Tosubaki ekile lo eking'aren ka aberu eyakatar eleu lokirion tochai kwa aribu.

Na asalunia aribu dio bu ataparachu. Toburakin Akuj nabo akwang'is nakachaan, kiwaak apusianut nakonyen, amilimil akolong lotim. Sodi ng'aren keng min ekile ka aberu eyakatar eleu lo akwaan, ng'akonyen napusiyek ta ng'itim lu emilmilete.

Kilokonyikin ataparachu tarau aripet. Ereewae akolong, tolem Akuj achaunet nanyan e ebong ka etorube lo aripet dio tosubakinia ekile ka aberu lu eleu alonyang, ng'itim lukirionok ka ng'akonyen na eriyete ekienyiyarito nakolong.

Anang'et ebong, apuloonikinit kidiama toya ng'akanyer ng'apeipei. Tokienyik Auj akibuses aang'orianut ang'alup ka aribu epetakina. Torau akirionut aka ng'itim, amilmil ang'akanyer torau ng'akonyen. Ng'aren keng awaasi ekile ka aberu eyakatar eleu long'or, ng'itim lukirionok ka ng'akonyen.

Tokienyikis ng'itieng daang ng'isubuna lu awaasi ang'akejen ang'arei, ayakatar kechi eleu lo amam ibore eburit, amam ng'ajul, ng'akopir tani ng'ikabebekwa. Kisemok Eng'atuny dae ekume keng dio tama, "Apedori ayong elany kechi nabo agwari ang'imager. Torimakinae kang'una."

Tachalau Etuko tama, Ng'achooro ng'ache ng'esi epedorete akitojok ekikwane keng. Tama Eris, "Mati ng'alimae ng'adikidio." Tobelak Etom, "Dir, ng'ajul nasiyayek ngesi ejokak."

Tokienyik Ekolia loapolon ng'ikekial, tamaisan king'olikinere aitanut. Woe, emam ng'igecha' ikokini ilulumae anakipi ai? Tarai bo' kechi kiyokiete. Ha!ha!ha! Tokieneta ng'ikolea nitieporoporote anakipi.

Abu Akuj tamaisan, "King'olikia, topedoreta akiyar mati kiyok ITWAAN ng'itieng daang, ng'anamia ka ibore daang nieyari, ng'ikito luuchik tani lu apolok. Anikisiak Itwaan akinyasun akwap kotere arorakanut keng inyasunio ng'esi dae." Kijuuroto ng'itieng, ng'ikolea ka ng'ikieny ilipito atamar eboyoto e ekisil. Potu robo ayong ka iyong eteto akwap yok nakatalaran!