Musa anaishi na wazazi wake katika kijiji cha Mafunzo.

Yeye ni mvulana mwerevu, lakini ni kaidi.

Musa pia ni mchokozi. Yeye huwapiga wenzake.

Pia huwapiga wanyama anapowakuta.

Siku moja anapokuwa akitoka shuleni, anamwona paka.

Anambeba paka yule na kwenda naye nyumbani.

Babake anapomwona, anamwambia, "Musa, acha kumnyanyasa paka huyo! Mrudishe mahali ulikompata."

Musa anakataa kumrudisha paka alikomuokota. Badala yake, anamfungia katika ngome.

Musa anapolala usiku huo, anaota ndoto.

Anamwona paka akiwa mkubwa kwa umbo huku akikimbia kuelekea mahali aliko. Kinywa chake ki wazi na meno ni makali. Paka anataka kumla Musa.

Paka anaanza kumeza miguu ya Musa. Anaikula hadi kwenye magoti.

Kisha Musa anaamka.

Siku inayofuata, Musa anamrejesha paka mahali alikomuokota.

Tangu wakati huo, Musa anaahidi kuwa mvulana mzuri.