Document

Koosaʼ wùn Waàŋgáa

Mohammed Kuyu

Jacob Kono

Yì-iì dzə̀ e ghan símóʼ sí, Koosaʼ wùmòʼ wáa dzə a jìŋ yár wun. Wù lò ji wun kóo a mbàv, yì léʼ.

Wù lò ji wun koó a bùn, bùn léʼ e kòʼ é kici. Koosaʼ nèn yèn wan lùm wo faŋèn wùmòʼ. Wù nèn rə̀m jii, "Lùm və́ne bòŋ e kfər feyì." Lùmé nèn yèn a Koosaʼ wiyì. Wú léʼ e dù e sar kimà ké kilan, e nèn tò e wùn bii. Koosaʼ yóŋ jii, "M kér fó tuŋ lùm e fəə́r fo wùn bii."

Koosaʼ nèn kèʼ a tuŋ. Wù túŋ e dù kwaʼda, a bii shoó ne é ŋàŋ. Kilán kìy ki nèn lò e gbù e Koosaʼ vighìy. La wù yoʼ yù fóo sə̀ŋ vighiy və́ fó sar kilan. Koosaʼ tóŋ kitávín jii, "Kifá ki rə̀ʼə́y ne mo. Wír a mǒ wùn. Wír a mǒ wùn."

Waàŋgáa yú mo Koosaʼ tóŋé, e nèn lèʼ e dù fo e dzə̀r jii, "Kì kòóy ka wò?" Koosaʼ nèn sùúy jii, "M kì túŋ lùm, kilán kìn ki nen gbù e mǒ vighìy. Waàŋgáa, wò woo ŋgaà mendzə̀n, kii wò, ku sə̀ mo."

Waàŋgáa suuy jii, "M koŋ fó sə wò. Yii bèy, a m dòr e kfə̀n njoò, a tíy rəne fàŋ, e kfə̀n a dzə̀r. A m sə̀ wò, à fò mo ka?" Koosaʼ bìnèr jii, "Èemò m yií naá viyíkir ve shuu woo taʼa, áà yí." Waàŋgáa nèn biìmé ji wun-éè sə́ á Koosaʼ.

Waàŋgáa nèn kèʼ e dòm kilán kìy, la kí yòʼ a wàʼ. Wù dóm, e kfə̀n dòm, e kfə̀n dòm. Vishí vi bóŋ, kilán kìy ki nèn tsə̀ʼ wún fo Koosaʼ vighìy. Waàŋgáa ŋwèʼ shéʼ.

Waàŋgáa dzə́r jii, "Vilaʼày vém ví bèé lèn". Koosaʼ káykír jii, "Vilaʼày ví yòʼ dzə̀. M lo e kfər wò kfərsín." Waàŋgáa yòŋ kitávín jii, "Kí m sə̀ ne wò. À kì yòŋ ji m wáa shìy a vilaʼày." Koosaʼ kòkìr, e sùúy jii, "M dzə̀ Koosaʼ, aà dzə̀ Waàŋgáa. Waàŋgáa dzə̀ viyíkir ve Koosaʼ."

Koosaʼ wùn Waàŋgáa nèn dù e yèn taàtá wùmòʼ. Waàŋgáa suúy jii, "Taàtá, kii wò, sə́ ver. Koosaʼ taʼ e kfər mo, yii bèy, a m fə̀ə́r wun fo kpu. Kilán ki kì rə̀ʼə́y vighiy və́, kí gháʼ fo wù fəə́r. Wù yòŋ ji m dòm é wun laámé á mo. M dóm kilán kiy, kí ló fó wun vighìy. Wù mèŋ ne lèn ŋkàʼmé və."

Taàtá suúy jii, "Kí yoʼ bòŋ. Koosaʼ, à kér shilív she bi shí." Koosaʼ nen ŋaàŋè a dzə̀ shuu. Wù dín sóŋ sə́ mo sí njímé e Taàtá, e yòŋ jii, "Taàtá, àáyà, lá à yòʼ jìvír mo fo m kfə́r Waàŋgáa. Aà yìi kilélé bo m lo, e kfər sa wò." Taàtá leéy wúné beémé wun.

Taàtá suúy jii, "Kii wò, lá à yòʼ kfə̀r mo. A tàm bo m suuy kintéŋ. Dzə̀ ben a suuy wò kinyo ke ru kí. Yòʼ dzə̀ m kfə̀n sùúy kinyo, bánlà a m yén kilán kee shó. Kì kòóy ka feyì feyì?"

Koosaʼ suúy jii, "Abay, dzə̀ kinyo fo tèr. Wìyi, é m din e wò." Taàtá wùn koosaʼ, à Waàŋgáa nèn kfə̀n fo kilan ki dzəə̀n. Taàtá dzə́r e Koosaʼ jii, "À kì lim a dzə̀ ka?"

Koosaʼ naàrì jii, "M kì jùm lùm, wú léʼ, e tò e wùn bii, m nèn a tuŋ. Kilán ki nen gbù e mǒ vighìy." Taàtá dzə́r shó jii, "Kilán ki dzə̀ kiné kí?" Koosaʼ bìnèr jii, "Dzə̀ kin." Taàtá dzə́r jii, "À kì tíy fo mbìv feé?" Koosaʼ bìnèr jii, "Fo mbìv fen."

Taàtá leéy Waàŋgáa e yòŋ jii, "À dzə̀ shi wán shé Waàŋgáa, à dòr, à dzə̀ là kitar. M yoʼ e biìmé ji dzə̀ à dòm á kimà ké kilan kisə." Waàŋgáa suúy jii, "Kì dòm mo." Taàtá suúy jii, "Dòm ri mo à kì dòmèn."

Waàŋgáa dóm, e kfə̀n dòm. Kilán kìy ki gbú e Koosaʼ vighìy. Taàtá dzə́r jii, "Kù yòʼ dzə̀ mo à kì yenen Koosaʼ, a wù dzə̀ bén a?" Waàŋgáa mèʼ kitú.

Taàtá nèn yòŋ jii, "Kí bòŋ ne. Bo nsaʼ mày ne lèn. Waàŋgáa, á leʼ a dù fo laʼ. M sí dù sa fo laʼ."

Á bèy, Taàtá wùn Waàŋgáa nèn dùkìr. Áwune-eè màʼtì Koosaʼ wo wù-uù dìnèn liì wo bi və̀y e sar kilan.

You are free to download, copy, translate or adapt this story and use the illustrations as long as you attribute in the following way:

Koosaʼ wùn Waàŋgáa

Author - Mohammed Kuyu, Elizabeth Laird
Translation - Beatrice Tafon Takeh, Mbinkar Emmanuel Keelen
Illustration - Jacob Kono
Language - Lámnsoʼ
Level - First paragraphs

© African Storybook Initiative 2016
Creative Commons: Attribution 4.0
Source www.africanstorybook.org
Original source www.ethiopianfolktales.com