Document

Wán wo wù fiirsin é ŋàŋ

Merga Debelo

Tadesse Teshome

Wìr wùmòʼ-oò kér wón vee vilum àtaár. Wo terí-iì fìír e shaà afə́r və́, a tàr wov nèn koŋ wun e ŋàŋ. Tàr wov nèn lo, e yèn ji wón və́ vee àbàá fèn sí yú a nyár yé fər wov. Tàr wov wìy lòo kpu, e lì nàʼ e dzə̀m e fò e wón vé mbìyí vee àbaà. Wù-uù lèm a dzə̀ nàʼ woó mbòŋ e mòʼón cáʼ e wàn wo terí. Yii bèy, afə́r vəə́ kú a yu nyár rə́.

Wáa dzə e kishiíy kímóʼ kí, áwune yòŋ jii, "Vèr kér fo see mboŋ wò." Mo wù-uù dzəə̀n wán wo téri, kinyo ke dzə̀ wù yiì kí yòʼ-oò dzə̀. Wù nèn yòŋ jii, "A si mo kí siìn, bo kinyo ke dzə̀ m kfə̀n yiì ki yòʼ dzə̀. M kù a lon a dzə̀ jii, vèn fó ri mo á júv." Á seé mbòŋ və̀y, wù nèn lì júv. Wù wìy e sàŋ júv rə̀y yì yúm, wù nèn li e kòʼ shó e kici.

Ndzə lòo sən, wónlě way ámóʼó nen wìy ji áwune shìíy á e sar kici fey. Ntìntìn vitsəʼ yiì gheén, wan və̀y nèn li kicí e kèʼ a dzə̀v júv rə̀y sho. Wù dzəv júv e kicí kí, kí wàa koo mo wám a kishèv bèy. Wónlě way viyi nèn a fan ji tàm a bo kinsəm ki waà wiyì. Áwune nèn tùmnén a leʼ, e màʼtì kaáyá wov fó.

Wan və̀y nèn sə̀ʼə́y fo kici e lì kaáyá və̀y e dù sho fo laʼ e yèn afə́r və́ shó. Á dzə́r e wun jii, "A kòóy vifá vin fo fee?" Wù bìnèr jii, "Á fiinè júv si lèn e kilùm feyì. M fiìnè júv yem e mòʼón, e nèn yùn vifá vìn."

Afə́r vəə́ nèn gìtì, e seèrí vév vee anàʼ. Áwune yùv anàʼ vìy, e lì júv si e dù sho e way, e nèn a jàŋ jii, "Júv se fiinèn sí, júv se fiinèn sí." Wír ve á dzəə̀n é wayí nèn sùúy jii, "Vèr yòʼ kér shií e věn juv." Kilòŋ kí shwiíy áwune féyì, a du e yòŋ e fər wov jii, "Mo à boʼtin ver, bo à ̀ lò e yu mo à koó. Vèr lo e tòn lav ye."

Mo wan və̀n dzəə̀n fií, wù nèn yòŋ jii, "Yòʼ dzə̀ m kfən sùúy kém ji ka? Kii vèn vèn tonè vèn fo ri mo a dzə̀ kibvə́." Áwune nèn tòn lav fər wov rə̀y. Wù nèn wày kibvə́ e kibàm, e dù ghán shó e ŋgaà mbàm wùmǒʼ laʼ. Ŋgaà mbàm və̀y nèn fò wun kirə́ʼ ke wù shiíy shó. Wu lò ji wun waà si du e neèm, e nen sùúy e ŋgaà mbàm və̀y jii, "Kibam kìn ki dzə̀ ke á kú gèʼ shó bìʼ fo kí kér vifá veé kilùm."

Wáa dzə kijàvndzə, wù nèn kèʼ a taŋnén taŋnén. Ŋgaà mbàm və̀y dù ji wun dzə́r á ji sà kooy ka á? Wan və̀y tóŋ tóŋén jii, "Wìr fèn sìíy ne e shòŋ vifá vém veé kilùm vìy, e lèm a dzə̀ kibvə́ fo." Mo ŋgaà mbàm yòʼ taʼ e yu ji wìr tòy á wun e kinyo, wù nèn sùúy jii, "M lo e way kifá ke à taʼ ji m wáy é kibàm foo fèy." Wù wáy sáŋ yee wit e kibàm fèy, e kfə̀n wày sá vifá ve yí vímóʼ ví vee jeéy, jeey.

Wan və̀y nèn kfə̀n fó laʼ e yòŋ aàfə́r vəə́ jii, "Vèn leéy e yèn búʼú, kibvə́ ki sì kifá keé kilùm. Vèn yén ri vifá ve m mùmèn e yunrí vi, a kù dzə̀ mbàm se m fiìnèn kibvə́ kiy sho." Afə́r vəə́ nèn dù kàŋ mòʼón e tònrì sa sév see lav. Áwune báʼtí kibvə́ e dù wáy shó, e nèn a jàŋ wáy kibvə jii, "Kibvə́ ke fiìnèn kí, kibvə́ ke fiinèn kí́." Wíri nèn a yòŋ aáwune jii, "Vèn yùŋsí bèn a dzə̀ ka? Yii yún la kibvə́?"

Kinyo kìn ki nyár áwune é ŋàŋ, áwune nèn sìysì ji á lo, e yuyrí a fə́r wov. Áwune dù e kùr wun aàkfə̀ə́ e wày é kigátí ji á du e dzə̀ə́r a e koŋ. Mo áwune béʼ kigátí du sho fo kóŋé dzəə̀n, áwune nèn tàrnén wùn a tàá wùmòʼ. Tàá suúy aáwune jii, "Nyám sém sí lò e lèʼkír, à dzə̀ vèn jùm, e koòrí, e fòo mo á?" Afə́r wan vəyí nèn sə̀ʼə́r kigátí e tìír fo nsay, e nèn shèr a dzə̀ kileʼ, e dù duùn.

Wan və̀y nèn jàŋ tàá fó mvə̀m kigátí fey. Tàá dzə́r jii, "Kooy ka wò?" Wan və̀y bìnèr jii, "Wíri kan mo ji m wáa dzə a fon." Tàá nèn dzə̀r jii, "Bo ki dzə̀ jii, a m nə̀ə́ e ŋkaà fèn, bo á ́ sí lo e koʼór mo ji fon a?" Wan vəy biime jii, "Eènó."

Tàá nèn bvə̀tì wán vəy wù fəə́ fo kigátí. Wun woo tàá nèn nəə́ e gòʼ e mvəm kigátí. Afə́r wan vəyi yiì wìy wùn a nyám sìy si, e kù nèn shùr kév kigátí kiy, e dù sho e dzə̀ə́r e koŋ. Wan vəy nèn lì nyám se tàá siy ji sə́ e dù sho fo laʼ. Afə́r vəə́ yén wun a wù dzə̀ə́ e tin, e nèn jàáy jaayín. Áwune ku ghày a dzə̀ jii, "A kòóy nyám sìn a dzə̀ fó feé?"

Wù bìnèr jii, "Nyám si dzə̀ é sar koŋ sinén. A vèn nə̀ə́ e kigátí, e dzə̀ŋrí e sə̀y é koŋ, bo vèn du e kòóy sa sén see nyám fo fo." Afə́r wan və̀yi nèn du e nə̀ə́ e vigátí, wu dzəə́r áwune é koŋ. Á bèy, wù nèn kèʼ a ker dzəʼə̀m ye juŋe.

You are free to download, copy, translate or adapt this story and use the illustrations as long as you attribute in the following way:

Wán wo wù fiirsin é ŋàŋ

Author - Merga Debelo, Elizabeth Laird
Translation - Beatrice Tafon Takeh, Mbinkar Emmanuel Keelen
Illustration - Tadesse Teshome
Language - Lámnsoʼ
Level - Longer paragraphs

© African Storybook Initiative 2016
Creative Commons: Attribution 4.0
Source www.africanstorybook.org
Original source www.ethiopianfolktales.com